LXXVI" HYSTOIRE

Comment le séneschal de Haynault se venga de sa ville de Werchin que les François avoient pilliet et arsse.

Quant les Franchois eurent fait leur emprise ainsy comme dessus est dit, ils se retirèrent par devers le Chastel-en- Cambrësis et se logèrent là environ jusques à le fontaine à Montay, Et entretant qu'ils furent là, on nonclia à Gérard de "Werchin qui estoit séneschal de Haynault, comment les François luy avoient ars et pilliet sa ville de Werchin. Sy en fut moult courchiés et laissa le parlement quoy et print congiet au conte de Haynault et print des compaignons, monseigneur Thiery de Walcourt, mareschal de Haynault, et des aultres compaignons environ XLV, et s'en vinrent une matinée devant soleil levant en l'ost des Franchois et se férirent ens à l'un des lés, et commenchèrent à décopper, frapper, hurter et à tuer tant que l'ost s'estourmy. Et monseigneur Gérard de Werchin et ses compaignons crièrent : « Haynault ! » Et Franchois furent moult espoentés, et commenchèrent à cryer à l'arme.

Sy y fut de la partye des François tués le sire de Bailleul normand et monseigneur Guillame de Brauthet et bien VIII aultres personnes ; et quant ils virent que l'ost s'esmouvoit, ils se retrayrent tout bellement et s'en revinrent en Haynault.