LXXXX" HYSTOIRE

Comment le duc de Normeudie manda secours au roy de France son père pour résister contre Edouart roy d'Engleterre.

Quant le duc de Normendie vid que ses gens estoient assiégiés en la cité de Vane, ainsy comme dessus avés oy, et qu'il n' avoit pooir pour eulx aidier, ne deffendre, et que son ost estoit à sy grant et périlleux meschief de tous vivres et de froit, et qu'il faisoit sy lait tamps que nul ne pooit durer, il envoia au roy Philippe, son père, mander que, touttes besongnes arrière mises, il le venist secourre, et qu'il amenast avoec luy II cardinaulx de par le pappe qu'ils prensissent ung respit ou trêves de II ans ou de III, et entandis on parleroit de l'accord. Et quant le roy de France entendy le message, il s'esploita et hasta du plus tost qu'il peult, et manda II cardinaulx à Rome, et assambla grant cantité de gentils hommes et de gens d'armes . Et quant tous furent assamblés, ils se misrent au chemin, et le roy et les cardinaulx après, et vindrent en Normendie, et se loga l'ost et le roy sur la rivière de Loire, assez près de l'ost au duc son fils, par moult lait tamps et froit, environ le Noël.

LXXXXl" HYSTOIRE.

Comment le roy Edouart d'Engleterre manda et requist la bataille au roy Philippe de France.

Quant le roy d'Engleterre sceult que le roy de France estoit venus et logiés sur la rivière de Loire, tantes après il luy manda qu'il passast oultre la rivière et il luy livreroit pièce de terre s'il se voloit combattre, fust corps contre corps, ou pooir contre pooir. Auquel mand le roy Philippe, ne son conseil ne vorrent entendre, et que pour ce n'estoientils mye venus, aincliois y estoient venus pour traictier et avoir trêves ou respit de guerre II ans ou III, par quoy on se peust partir et évader de ce froit et lait siège honnourablement.