CIV« HYSTOIRE

Comment madame Jehenne de Valois qui fut femme du bon conte Guillame de Haynault, puis nonne à Fontenelle, et monseigneur, Jehan de Haynault sire de Beaumont mandèrent l'empereys Margueritte pour estre contesse comme héritière du pays de Haynault, Holande et Zélande.

Quant le conte Guillaume de Haynault fut mort en la bataille des Frisons, sycomrae nous venons de faire mention, il n'avoit régné conte, puis la mort du bon conte Guillaume son père, que l'espasse de IX ans, et XIX ans qu'il avoit quant son père le fist chevalier. Ainsy il n'avoit que XXVIII ans, quant il demoura en Frise, et morut sans avoir nul hoir de sa char de Jehenne de Brabant, sa femme. Sy eschéy la conté de Haynault, de Holande et de Zélande, comme au droit hoir, à madame Margueritte, royne d'Allemaigne et impéryesse des Romains, à laquelle madame Jehenne de Valois, nonne de Fontenelles et jadis contesse de Haynault, estoit sa mère, et monseigneur Jehan de Haynault, son oncle, frère de son feu père ; lesquels madame Jehenne, jadis contesse, et monseigneur Jehan de Haynault mandèrent ladite empereys qu'elle venist en Haynault pour relever sa terre qui îuy estoit escheue et faire homage à ses bonnes villes, et qu'elle venist sy fondée de l'empereur, son mary, et de son bon conseil, qu'elle fust recheue sans débat.