EXTRAICT DES REGISTRES DE PARLEMENT
Ce iour, sur ce que le procureur gênerai du Roy a dict à la Court, auoir commandement dudict seigneur, faire entendre que, sur l'edict par luy faict pour reprimer le luxe des habillemens, il y auoit quelques articles qui estoient ambigus et douteux : par le moyen desquels les sergens en abusoient : sur lesquels il auoit faict apostiller la déclaration de sa volonté, pour après enioindre au preuost de Paris ou son lieutenant de faire garder. Lecture faicte dudict edict sur l'impression , auec les apostilles sur les articles second et douziesme d'iceluy edict : la matière mise en délibération, ladicte Court a arresté et ordonné, que les apostilles et adiection faictes sur lesdits second et douziesme articles seront adioustez en l'impression dudit edict, pour cstre enuoyé au preuost de Paris ou son lieutenant, à fin de le faire garder et obseruer, et aux sergens d'y obeyr, sans en abuser. Faict en Parlement, le vingtuniesme iour d'auril, l'an mil cinq cens quatrevingts trois.
Signé, DEIÏEVEZ.
DE PAR LE ROY
Nostre amé et féal, combien que, par l'ordonnance et reformation par Nous faicte au mois de mars dernier pour le faict des habillemens , nous vous ayons tresexpressement commandé la faire garder et obseruer : toutesfois, à ce que nous voyons , il n'est du tout satisfaict à nostre intention, ains seulement par aucuns, se voyant beaucoup de contrauentions à nostre ordonnance es villes et autres lieux de vostre ressort. Ayant, pour ceste cause, aduisé de vous renuoyer l'exemplaire de nostre dicte ordonnance, laquelle Nous voulons et vous mandons tresexpressément icelle faire derechef publier à son de trompe et cry public, par toutes les villes, bourgs, lieux et villages de vostre dict ressort, à fin que personne n'en puisse prétendre cause d'ignorance. Vous mandant aussi, sur tant que desirez nous obeyr et complaire, la faire garder et obseruer soigneusement, comme il vous est mandé par icelle : sur peine de Nous en prendre à vous, et de Nous en respondre en vostre propre et priué nom. Et , à fin que ce puisse estre sans excuse. Nous voulons que vous bailliez certification de la réception de la présente. Car tel est nostre plaisir. Donné à Coinfii-l' Abbaye, le quatriesme iour de juin, mil cinq cens quatre vingts trois. Signé, , HENRY.
Et au dessoubs, Pinart.
Leu et publié à son de trompe et cry public, par les carrefours de ceste ville et faulxbourgs de Paris, et reïteré aussi la publication de ladicte ordonnance, par moy Thomas Lauuergnat, crieur iuré du Roy es ville, preuosté, et vicomte de Paris : accompagné de Philippes Noiret, commis de Michel Noiret, trompette iuré dudict sieur esdits lieux, et de deux autres trompettes, le mardy quatorziesme iour de juin, l'an mil cinq cens quatrevingts trois.
T. Lauvergnat.
DE PAR LE ROY
