II. — Ledit tanné n'est point défendu
S'il sera permis aux gens d'église, qui ne sont gentilshommes, de porter soye sur soye ?
5. — Les euesques , abbez et premières dignitez des églises cathédrales et collégiales, pourront porter soye sur soye?
Si, sur ces mots gentilshommes, les gens de justice et robbe longue, qui sont gentilshommes, sont comprins. Et en ce plaira considérer que, souz ombre de ce, l'edict n'est point gardé : car chacun se dit gentilhomme. Et si les offices de conseiller de la cour, secrétaire du Roy et autres
annoblissent les personnes, quant àrobseruance del'edict, ores qu'ils soyent d'ailleurs nobles?
6. — Le Roy entend que les gens de robbe longue, qui sont gentilshommes, puissent porter soye, et en user, ainsi que les autres gentilshommes, horsmis es lieux esquels est défendu à noz officiers de justice porter robbe de soye. Veut aussi que les secrétaires de luy , de la maison et couronne de France, en puissent porter, comme nobles et non comprins audit edict.
Si, souz ces mots bonnets de veloux, les chappeaux et calottes de veloux sont comprins?
7. — Ledit seigneur entend que les chappeaux de veloux sont comprins audit edict.
Si les domestiques de la maison du Roy, qui ne sont actuellement seruans, et qui sont hors leur quartier, sont comprins en l'exécution de l'edict?
8. — Lesdits domestiques iouyront de l'exemption de l'edict, en seruice et autrement.
Si souz ces mots de mechaniques sont comprins les marchans vendans en détail, et les principaux mestiers de Paris, comme orfeures, apothicaires et autres : et si les femmes des mechaniques porteront soye en leurs bordures et ailleurs ?
9. — Tous marchans vendans en détail et gens de mestier sont comprins audit edict : mais bien pourront leurs femmes porter soye en doublures , bords et manchons.
DE PAR LE ROY
Noz amez et féaux. Nous auons veu les articles des difficultez, par vous enuoyées à nostre trescher et féal chancelier, sur aucuns poincts contenus en l'edict prohibitif de porter draps de soye : sur lesquels et en la marge d'iceux ,
Nous auons fait escrire et apostiller l'interprétation d'iceux poincts, telle que nous voulons estre suyuie en l'obseruation d'yceluy edict , et présentement les vous renuoyons : voulant et vous mandant iceux faire entretenir , ensuiure et obseruer selon ladite interprétation , et aduertir les substituts de nostre procureur es sièges du ressort de nostre Parlement de Paris, pour obuier aux doutes qui s'en pourront sur ce faire ausdits sièges. Fait à Folembray, le dixseptiesme iour d'octobre, mil cinq cens quarante neuf. Signé, Henry. Et au dessouz, De l'Aubespine.
