TITRE XXXII ET DERNIER

Del Tonlieu et del Halage de lin et de chanvre.

Lins ou chanvres aportës à col au samedi , s'il est mis à terre ou à estai , doit ob. de halage. Se cilz qui li lins est en vent tant seulement une poingniée , il ne doit point de tonlieu ; deuz poingniées ou iij doivent ob. de tonlieu, iiij poingnées doivent j den. de tonlieu; et cnsinc del plus plus, si come il est dit par devant.

Se lins ou chanvres sont aporté à Paris au samedi en marchié, à cheval , et soit à j home , se il le met à terre ou à estai , et il deslit son sac, il doit ob. de halage; et s'il en vent aucune chose, il doit ij den. de tonlieu. Se li lins ou la chanvre sont à pluseur homes, et il est aportés à cheval , chascun paiera ob. de halage se il ont desliié ; et au vendre , paiera chascuns ij den. de tonlieu.

Se lins ou chanvre est aportés au samedi, à cheval, por vendre, et ne soit pas vendus touz, et se soit aquités en la manière desuz devisee , vendre le puet seur semaine sans coustume ; et se il le raporte au samedi après, vendre le puet par cel meisme tonlieu, et mètre à terre ou à estai par ob. de halage paiant ; et se il est à pluseurs , et se soient aquité en la manière devant devise', vendre le puent par meisme le tonlieu et le halage que il auront poiez.

Lins ou chanvre aporté à charète au samedi ens haies, ou en autres jours , doit iij den. de tonlieu et j den. de halage , se il est à j home et soit mis à terre ou à estai ; se il sont à pluseurs homes, chascun paiera au sémedi j den. de tonliu et ob. de halage, et es autres jours ne paieront que iij den. de tonlieu et j den. de halage, ja tant de conpaignons ni aura.

Lins et chanvre aporté à col , à cheval , à char ou à charrète, doit double tonlieu la première fois que il sera aportez pour vendre, et vendus, tant come la foire Saint-Ladre et la Saint- Germain-des-Prés sient ; et aus autres fois doit simple tonlieu . c'est le tonliu devant devisé, se il en vant poi ou grant.

Chanvre qui vient par eaue, se èle est portée au marchié à cheval ou à charète hors jour de marchié , li vendères et li achatères se aquiteront le jour chascun pour j den. ; et se èle est mise au sémedi à terre ou à estai, si doit ob. de halage.