CXXII. — 29 septembre
Accord entre deux bourgeois de Rouen au sujet de l’usage des latrines que l’un d’eux a fait faire dans sa maison et dont l’autre obtient la permission de se servir, sa vie durant, moyennant le paiement d’une somme de 12 livres. (Reg. du tabellionage de Rouen, 1433, fol, 198 versO.)
Mardi xxix° jour de septembre mil iiij° xxxiij........ Martin Hubert d’une part et Pierre Fossecte d’autre touz demourans en la parroïsse Saint Laurens de Rouen en deux maisons joignans l’une a l’autre, en la rue du Fossé aux Gantiers, confesserent avoir fait traictié et appointement entre eulx des choses cy aprés desclairées en la maniere qui ensuit : C’est assavoir que ledit Hubert voult, consenti et accorda, veult, consent et accorde par ces presentes pour lui et les siens que ledit Fossecte et Collecte sa femme, durans les vies d’iceulx mariez, et le survivant d’eulx deux seullement, aient ung siege d’aisemens de corps aux aisemens que ledit Hubert a nagueres fait fere tout de neuf en son heritage joingnant a l’eritage ou demeurent lesdiz mariez, lequel siege sera en la gallerie dudit Hubert, de la haulteur du second estage de la maison d’iceulx mariez, a l’endroit ou ilz font de present leur chambre, en laquelle chambre sera fait tout de nouvel ung huis pour entrer et yssir en icelle gallerie et siege d’aisemens, ouquel siege aura place convenable et
y aura une veue verrée a verre dormant de haulteur raisonnable ; et ou cas que lesdiz mariez ou le survivant d’iceulx yroient demourer ou partiroient dudit hostel où ilz demeurent de present, ilz seroïent tenuz de faire estoupper ledit huis, et aussi ledit Martin Hubert et ses hoirs pourroient reprendre en leur main icelle place et siege d’aisemens et en faire come de leur propre chose et heritage, et faire estouper icelui huis se estouppé n’estoit; mais se aprés ledit partement lesdiz mariez ou l’un d’eulx revenoient demourer en icelui hostel, ilz auroient ledit siege d’aisemens leurs dictes vies durans comme dit est, comme euparavant de leurdit partement. Et pareillement aprés le decès du derrain trespassé d’iceulz mariez, ledit Hubert, ses hoïrs et aïans cause pourront reprendre en leur main ladicte place et siege et leur revendra comme leur et leur propre heritage sans contredit ne empeschement que l’en y puisse mectre. Et sera ledit huis ainsi nouvel fait en icelle chambre osté, et la bée d’icelui plastrée et estouppée comme ouparavant de ce present contrault et sans ce que ce present traictié face ou porte aucun prejudice audit Hubert ne aux siens ne que pour icelui les proprietaires ou terans l’eritage où demeurent iceulz mariez après leurs diz decés puissent avoir ne acquerir aucune possession en icelle place et siege d’aisemens; et demourra la chose en telle maniere que se ce present traictié n’eust onques esté fait. Et s’il esconvient vuider la fosse d’iceulx aisemens durans les vies d’iceux mariez ou du sourvivant d’eulx deux, ilz seront widez et y contribueront yceulx mariez en tiers et ledit Hubert es deux pars des coustemens sur ce faiz. Cest traictié et accord fait moiennant la somme de douze livres tournois que en paia ledit Fossecte audit Hubert et dont icelui Hubert se tint a content, et par ce aussi que ledit Fossecte sera tenu porter en sa paroy le bout des soliveaulx
d'icelle gallerie a tousjours. Et promistrent icelui Hubert et Fossecte, tant pour eulx etc., ce present traictié et appointement par eulx ainsi accordé l’un a l’autre tenir, enteriner, acomplir et avoir agreable, sans aler encontre, sur l’obligacion de touz leurs biens etc., jurans ete. Presens Jehan Duclos et Jehan de Brunville,
