CXLII. — Rouen, 8 janvier 1436 (n. st

Mandement de Jean Stanlawe, trésorier et général gouverneur des finances de Normandie, pour la construction d’un boulevard au château de Rouen. (Arch. de la Seine-Inférieure, Fonds Danquin. Original.)

Jehan Stanlawe, escuier, tresorier et general gouverneur des finances du Roy nostre sire en Normandie, au viconte de Rouen salut. Nous pour la surté, deffence et sauvegarde du chastel de Rouen et mesmement de la ville dudit lieu de Rouen, vous mandons et enjongnons que en

toute dilligence pocible vous, par l’advis du maistre des œuvres de charpenterie du Roy nostre sire eu bailliage dudit lieu de Rouen, faictes fere tout de neuf ung boullevert de bois sur une plate fourme pour tenir ferme et porter saillie telle que on y puisse faire murdrieres a six paons joingtis a tenon et mortaize par le bas, et par le bout de hault seront fermés de deux pieces de bois l’une dehors et d’autre dedens, quevillies de quevilles de fer ainxi qu'il appartendra et aura en chaseun paon une barbequenne, lequel boullevert sera mis et assis sur une tour qui est au coing du boullevert de pierre dudit chastel par devers la ville dudit lieu de Rouen pour deffendre ladicte tour ; et ce que ledit ouvrage coustera, soit a tache ou à journées, tant en paine d’ouvrier come en matieres, poiez des deniers de vostre recepte jusquez a la somme de cinquante livres tournois ou au dessoubz, et par rapportant ce mandement avecquez quictance suffisant des ouvriers qui auront faicte ladicte besongne et certifficacion dudit maistre des euvres, ce que poyé aurez jusquez a ladicte somme dessusdicte sera aloué en voz comptes et rabatu de vostre recepte partout ou il appartendra. Donné a Rouen, le viij® jour de janvier l’an mil iñij® trente cinq. jSigné] Duffour, avec paraphe).