CXC. — Rouen, 17 octobre

Henri VI autorise les religieuses Emmurées de Rouen à faire débiter à la scie le bois qu’elles ont le droit de prendre, par la livrée du verdier, dans la forêt de Rouvray pour leur chauffage et la reconstruction de leur

couvent, démoli par suite de la guerre. (Cartulaire des Emmurées, fol. 116-117.)

Henry etc. À nostre amé et feal conseiller Guillaume Oldalle, chevalier, .maistre enquesteur et general reformateur de noz eaues et foretz en Normendie ou a son lieutenant salut et dillection. Receue avons l’umble supplicacion de noz bien amées les religieuses prieure et convent de Saint Mahieu des Ammurées prez Rouen, contenant come au droit de la fondacion de leur eglise ilz aient droit d’avoir et prendre en noz bois et forestz, et en especial en la forest de Rouvray, bois pour leur ardoir a l’eusage de leur hostel de Saint Mahieu, et aussi bois pour maisonner en leurdit hostel et pour toutes leurs autrez maisons et granches, duquel bois prendre par la livrée des verdiers et icelui decoupper et detailler a la sye lesdictes suppliantes et leurs predessesseresses aïent esté en bonne saisine et possession par tel et si longtemps qu'il n’est memore d’omme au contraire, et jusquez a nageres et puis demy an ença ou environ que nostre lieutenant leur a fait empescher et deffendre que a prendre ledit bois ilz n’eusent de sye maïs seullement de hache, serpe ou autre ferrement que sye, disant qu'il est ainsi deffendu a tous coustumiers esdictes forestz par certaines ordonnances royaulx causées pour doubte que par lesdiz coustumiers n’en soit trop excessivement [prins] en le detaillant en ladicte sye plus que en la hache, quelle chose ne se peult ne doit entendre au regart des dictes suppliantes actendu qu’elles ne sont pas de la condicion des coustumiers mais est leur tiltre droiture créé audevent desdictes ordonnances, come ilz presuposent, et aussi que presuposé que ce fust depuis, se leur est ledit bois acoustumé estre livré et limité par les verdiers come dit est, qui sayvent et congnoissent combien il leur en fault

et ne leur en livrent que justement ce qui leur en est neccessere, et ainsi ne pevent lesdictes suppliantes prendre excessivement ne par oultrage en le decouppant a ladicte sye ne autrement, ce qui n’en est pas ainsi fait au regart des coustumiers, car plusieurs en y a a qui il ne convient que menus arbres qui sont assés aisiés a deppicer a la hache sans sye, et aussi ne leur en a point esté acoustumé fere de livrée par le verdier ne autrement, mais au regart desdictes suppliantes elles arroient aussi bon marché de charger bois sur les kays de nostre ville de Rouen come de le prendre et avoir en nosdictes forestz se ladicte deffence avoit lieu qu'’ilz ne le peussent fere decoupper a la sye aprez ce qu'il est abatu, car communeement la livrée qui leur en est faicte est en gros arbres, plains de neulz, mauvez a maneuvrer, et ne se peult detailler sans la sye, et qui autrement le feroït cousteroit plus qu’il ne vauldroit, et si s’en yroit plus du tiers ou moitié en coeppeaulx s’il estoit deppeché en la hache, qui seroit degaste et dommage pour nous et pour lesdictes suppliantes, ausquelles par ce moyen leurdicte droiture et

franchise seroit inutille, en leur tres grant grief, preju- :

dice et dommage, et plus pourroit estre se sur ce ne leur estoit par nous pourveu de nostre gracieux et convenable remede, si come ilz dient, en nous humblement requerant icelui; Pour ce est il que nous, ces choses considerées et aussi la poureté desdictes suppliantes, qui a grant païne pevent avoir leur vie et substantacion et que a l’occasion de la guerre et especialment pour cause du siege qui fu mis devant nostredicte ville de Rouen par feu nostre tres chier seigneur et pere, que Dieu pardoint, leur eglise, maisons et ediffices furent demolies et abatues et n’ont de quoy les fere rediffier, a icelles suppliantes avons octroyé et octroyons de grace especial par ces presentes que ledit bois qui par noz verdiers leur sera livré en nosdictes fo-

restz pour leur ardoir et maisonner y puissent fere decoupper et detailler soit a la sye, hache, serpe ou autre ferrement jusquez a deux ans prouchaïins venans. Si vous mandons et expressement enjoingnons que de nostre presente grace et octroy vous faictez, souffrez et laissez lesdictes suppliantes jouir et user plainement et paisiblement sans leur fere mectre ou donner ne souffrir estre fait, mis ou donné aucun destourbier ou empeschement au contraire. Car ainsi nous plaist il ete. Donné a Rouen le xvij° jour d’octobre l’an de grace mil inije xlvi.