XL CHANSON NOUVELLE

Faicte sur l'espérance de la paix et se chante

sur le chant :

Amours m'ont cousté cens livres.

Quand Jesus-Christ vint sur la terre, A tous humains il apporta la paix En jectant arrière guerre Pour mieulx le monde vivre en paix.

Plus ne pourrons vivre en souffrance, Grâces à Dieu le père créateur,

Car l'on veult traicter paix ensemble Entre le Roy et l'Empereur.

C'est à vous une grande souffrance, On congnoyt bien les Béguins et Courtoys, Bourguignons et millours de Flandres Se complaignant à ceulx d'Artoys.

Quand Jesus-Cbrist, pour tout le monde, Mourut en croix, laissa par testament La paix de Dieu tres-pure et mande Qui garde son commandement.

France, Normandie et Bretagne, Savoysiens, Genevoys, Italiens,

Flandre, Bourgogne et Espaigne, Monstrez-vous estre vrays chrétiens.

Qui cherche guerre, il se condamne, Oster pouldres, glaives d'acier et fer; Dieu ne veult pas que nul se damne Par faulte d'amour ensuivir.

Guerre se retire en Turquie Pour attirer les Turcs en nostre loy, Car à la fin, dist le bon messie , Tous mescréans tiendront la foy.

Dieu le premier et le Sainct Père Traictent la paix avec tous les humains, Dont le bon temps chascun espère ; Grâces à Dieu, joignons les mains.

Or prions pour le Roy de France Que Dieu luy doint bon conseil et confort,

Aussi paisible alliance

A tous ses serviteurs confort.