XIII. CHANSON NOUVELLE

Faicte sur l'espérance de la paix et se chante sur le chant : Aujoly boys, sous la couldroye, jamais plus ne le verray.

Espaignols, Italiens, Et tous les enfantz de Flandres Qui avez tenu rigueur Contre le Roy de France ; Mais vous avez le prébende De Charles dict Empereur, Car le noble roy de France Y a espousé sa sœur.

Madame Alienor, A présent Royne de France, Quand son mary se partit De Moulins, ville plaisante, Elle luy feist la révérence Et luy dist Mon bon seigneur, Que facez la paix ensemble Entre vous et l'empereur.

Et vous, Monsieur le Dauphin Qui estes l'aisné de France Et qui avez le crédit D'avoir toujours grand puissance, Ne regardez pas l'offense Que ont faict vos ennemys, Mais faictes la paix ensemble Entre mon frère et mon mary.

Et le Connestable aussi Qui est fort aimé en France, Je vous prie tant que je puis Que facez une alliance ; C'est du noble Roy de France Et aussi de l'Empereur, Qu'ils soient bons amys en France Sans jamais avoir rigueur.

Je vous prie tant que je puis, Monsieur l'Admirai de France, Que facez, se vous povez, Que nous ayons la paix ensemble Et allez en diligence, Je vous prie humblement, Vers le Sainct père de Romme Qu'il face l'appoinctement.

Nous prions tous bons Françoys Pour le noble Roy de France Et pour Monseigneur le Daulph Et pour toute leur alliance ; Et pour tout le sang de France Qui ayment les fleurs de lys, Qu'ils facent la paix ensemble Sans jamais estre ennemys.