XVIII. CHANSON NOUVELLE

Sur les accords faicts entre le Roy et l'Empereur et se chante sur le chant : Je voz supplie oyez comment en amours je suis mal traicté.

Je vous supplie, oyez comment Nous devons vivre sans esmoy

Et prendre joye et esbattement, En priant pour le noble Roy Qui tant son peuple a aymé De faire bon appoinetement, Que tous les montz il a passé Pour tenir le droict portement.

Celuy dont je faictz mention Est noble sur tous les humains, Il a faict paix et union Au noble Empereur des Romains.

Or luy rendons à joinctes mains Grâces en priant de bon cueur Le Saulveur de tous les humains Que jamais n'ayent de rigueur.

Joye de bon cueur démenons Et mettons hors tous nos soucys, Puisque la paix en France avons, Nous debvons bien croire cecy.

Le Pape y a si bien servy Qu'il les a mis en union En leur disant : Mes beaulx amys, N'ayez plus de dissention.

La Royne a bien faict son debvoir D'ayder à appoincter cecy, Affin de guerre plus n'avoir Son frère alla veoir en son lict, En luy disant : Mon doulx amy, Vous qui estes vray Empereur, Faictes paix avec mon mary Et plus ne soyez en esmoy.

Nobles, marchants et laboureurs, Nous debvons trestous esjouyr

Puisque le Roy et l'Empereur Ont faict la paix à grand désir ; Vous pouvez aller et venir Marchander avec vos amys; La paix avons qui est bon bruict De par le Roy des fleurs de lys.

De bon cueur prières ferons A Marie et à son fils, Pour les princes que nous voyons Qui sont maintenant bons amys.

Que tous maulx faicts soient remis Sans plus avoir dissention ; Prions Jésus de paradis Qu'à la fin nous face pardon.