XXVI. CHANSON NOUVELLE

Faicte sur la paix, et se chante sur le chant Amours m'ont cousté cent livres.

Donnons à Dieu louanges et gloire Tendant au ciel les yeulx, mains et les bras; De ses bienfaictz ayons mémoire, Ne soyons pas enfans ingratz.

L'Empereur et le Roy de France Ont de la paix trouvé temps opportun; Plus ne seront mis en souffrance :

Le vouloir de deux c'est tout ung.

France, Bourgogne et Picardie, Ensemble auront amour doresnavant ; Les Hennoyers en Normandie Marchanderont à tout venant.

Justice et paix d'une alliance Par bonne amour se sont entrebaiséez ; Guerre a perdu force et puissance Les arméez rompues et briséez.

Guerre s'en va en la Turquie ; L'Aigle et le Coq en union enclos Sont laissés en reliquie; Les soudars bannis ou forclos.

Doubtes ne fault Turc ni infidelle, Mais que le Roy et le noble Empereur Tiennent la foy des bons fidelles; Craindre ne devons leur fureur.

Aux chrestiens seroit grand honte De les laisser user d'auctorité,

Ne souffrir que nul nous surmonte Adnihillant chrestienté.

Nous avons bon temps, s'il n'empire, Mercions Dieu, nous y sommes tenus ; Tous les gens subjectz à l'empire Sont en France les bien venuz.

Les subjects du Roy, par semblance, Pourront aller par la terre et la mer, Faire marchandise honorable, Sans que nul nous puisse blasmer.

Grandz et petits démenons joye, Mercions Dieu de cueur en faictz et dictz ; C'est celuy qui donne et octroyé Paix et en la fin paradis.