LOUIS XI IN JEOPARDY AT PERONNE

Or vous avez ouy de l’arrivée de cette armée de Bourgogne; laquelle fut à Péronne presque aussi tost que le Roy (car ledit duc ne les eut sceu contraindre ny contremander à temps) ; car jà bien avant estoient en compagne, quand la venue du Roy se traitoit, et troublèrent assez la feste par les suspicions qui advinrent après. Toutesfois ces deux princes commirent de leurs gens à estre ensemble, et traiter des leurs affaires le plus aimablement que faire se pourrait, et comme ils estoient bien avant 30 en besogne, et jà y avoient esté par trois ou quatre jours, survinrent de très-grandes nouvelles et affaires de Liège que je vous diray.

Le Roy, en venant à Péronne, ne s’estoit point advisé qu’il avoit envoyé deux ambassadeurs à Liège, pour les solliciter

Philippe de Comines. 1 1

contre ledit duc, et néantmoins lesdits ambassadeurs avaient si bien diligenté, qu’ils avoient jà fait un grand amas, et vinrent d’emblée les Liégeois prendre la ville de Tongres où estoient l’évesque de Liège, et le seigneur d’Hymbercourt bien accompagné jusques à deux mille hommes et plus ; et prirent ledit évesque et ledit d’Hymbercourt, tuèrent peu de gens, et n’en prirent nuis que ces deux, et aucuns particuliers de l’évesque. Les autres s’enfuyrent, laissans tout ce qu’ils avoient, comme gens desconfits. Après cela lesdits Liégeois se mirent en chemin vers la cité de Liège, assise assez près de ladite ville de Tongres. io En chemin composa ledit seigneur d’Hymbercourt avec un chevalier, appellé messire Guillaume de Ville, autrement dit en françois le Sauvage. Cedit chevalier sauva ledit d’Hymbercourt, craignant que ce fol peuple ne le tuast, et retint sa foy, qu’il ne tarda guères ; car peu après il fut tué luy-mesme. Ce peuple estoit fort joyeux de la prise de leur évesque, le seigneur de Liège.

Ils avoient en haine plusieurs chanoines qu’ils avoient pris ce jour, et à la première repuë, en tuèrent cinq ou six. Entre les autres en y avoit un, appellé maistre Robert, fort privé dudit 20 évesque, que plusieurs fois j’avoys veu armé de toutes pièces après son maistre ; car telle est l’usance des prélats d’Allemagne. Ils tuèrent ledit maistre Robert, présent ledit évesque, et en firent plusieurs pièces, qu’ils se jettoient à la teste l’un de l’autre, par grande dérision.

Avant qu’ils eussent fait sept ou huit lieues, qu’ils avoient à faire, ils tuèrent jusques à seize personnes, chanoines ou autres gens de bien, quasi tous serviteurs dudit évesque. Faisans ces œuvres, laschèrent aucuns Bourguignons ; car jà sentoient le traité de paix encommencé, et eussent esté contraints de dire 30 que ce n’estoit que contre leur évesque, lequel ils menèrent prisonnier en leur cité. Les fuyans, dont j’ay parlé, effrayoient fort tout le quartier par où ils passoient, et vinrent tost ces nouvelles au duc. Les uns disoient que tout estoit mort, les autres le contraire. De telles matières ne vient point volontiers un message seul ; mais en vinrent aucuns, qui avoient veu habiller ces chanoines, qui cuidoient que ledit évesque fust de ce nombre, et

ledit seigneur d’Hymbercourt, ce que tout le demeurant fut mort ; et certifioient avoir veu les ambassadeurs du roy en cette compagnie, et les nommoient. Et fut conté tout cecy au dit duc, qui soudainement y ajousta foy, et entra en une grande colère, disant que le Roy estoit venu là pour le tromper ; et soudainement envoya fermer les portes de la ville et du chasteau, et fit semer une assez mauvaise raison, c’estoit qu’on le faisoit pour une boëte qui estoit perdue, où il y avoit de bonnes bagues et de l’argent. Le Roy, qui se vit enfermé en ce chateau (qui est petit) et force archers à la porte, n’estoit point sans doute : et se voyoit logé rasibus d’une grosse tour, où un comte de Vermandois fit mourir un sien prédécesseur roy de France. Pour lors estoye encore avec ledit duc, et le servoye de chambellan, et couchoye en sa chambre quand je vouloys : car telle estoit l’usance de cette maison. Ledit duc quand il vit les portes fermées, fit saillir les gens de sa chambre, et dit à aucuns que nous estions, que le Roy estoit venu là pour le trahir, et qu’il avoit dissimulé ladite venue de toute sa puissance, et qu’elle s’estoit faite contre son vouloir ; et va conter ses nouvelles de Liège, et comme le Roy l’avoit fait conduire par ses ambassadeurs ; et comme tous ses gens avoient esté tuez, et estoit terriblement esmeu contre le Roy et le menaçoit fort ; et croy véritablement que, si à cette heure là il eut trouvé ceux à qui il s’addressoit, prests à le conforter ou conseiller de faire au Roy une mauvaise compagnie, il eut esté ainsi fait : et pour le moins eut esté mis en cette grosse tour. Avec moy n’y avoit à ces paroles que deux valets-de-chambre, l’un appellé Charles de Visen, natif de Dijon, homme honneste, et qui avoit grand crédit avec son maistre. Nous n’aigrismes rien, nous adoucismes à notre pouvoir. Tost après tint aucunes de ces paroles à plusieurs, et coururent par toute la ville jusques en la chambre où estoit le Roy, lequel fut fort effrayé ; et si estoit généralement chacun, voyant grande apparence de mal, et regardant quantes choses y a à considérer, pour pacifier un différend, quand il est commencé entre si grandes princes, et les erreurs qu’ils firent tous deux de n’advertir leurs serviteurs, qui estoient loin d’eux, empeschez pour leurs affaires, et ce qui soudainement en cuida advenir.

Guillaume Coquillart.