SCENE PREMIERE

LUSCINDE, PHILOCTETE.

LUSCINDE

TOY qui sçais de quel œil il vit borner ses jours, Fay-moy de ce trespas le tragique discours. Quelle fut sa vertu ?

Philoctete.

La mort luy parut telle Que la vie à nos yeux ne fut jamais si belle.

LusciNDE.

Dieux! Et quel luy parut ce brasier dévorant?

Philoctete.

Ce que te paroistroit un parterre odorant. Il fit sa mort célèbre, il en bénit les causes, Et fut dans les charbons comme parmy des roses.

LusciNDE.

D'un front tousjours esgal?