CHAPITRE XII

aller plus oultre; mais puisque mon heure est prochaine, il est temps que je pourvoye à mes dernières affaires. Je vous prie, Messieurs, quand Dieu m'aura appelé à l'autre vie, souviennez-vous d'avoir toute ma famille recommandée envers la royne, et lui ramentevoir mes longs et fidelles seryices^ qui ont esté les meilleurs que j'ay peu envers les roys mes hons maistres et envers elle, et luy dire que s'il luy plaist départir à mon fils mes estats, j'espère qu'elle en sera bien et fidellement servie. Quant à messieurs les cardinaulx mes frères, je croy qu'ils se contentent des biens qu'ils ont. Il fault que je die de M. d'Aumalle mon frère, que c'est un bon et vaillant capitaine qui a bien et longuement servy, et qui mérite qu'on le recongnoisse. Quant à moy, vous voyez Testât où je suis réduit par la blessure d'un homme qui ne sçavoit pas bien ce qu'il faisoit. Je vous prie faire très humble requeste à la royne, qu'en l'honneur de Dieu et pour l'amour de moy, elle lui pardonne. S'il est trouvé avoir offensé le public, je n'y touche point; mais en ce qui concerce l'intérest particulier de ma vie, suppliez-la affectueusement de ma part qu'il ne reçoive aucun dommage; et vous qui en estes la cause, je vous suis grandement obligé : je serois bien ingrat si je ne vous remercioys, puisque, par vostre moyen, je suis voisin de l'heure où j'espère asseurément m'approcher de mon Dieu et jouyr de sa présence. Les roys ont de belles maisons, les princes en ont, j'en ay de belles, mais ce ne sont que ténébreuses prisons auprès de la saincte cité et de la haulte habitation où je m'advance. C'est le temps où je doibs penser aux offenses que j'ay faictes, et recueillir les faultes de ma vie. Vous sçavez que j'ay eu de grandes et difficiles charges, et ce a esté sans les chercher. J'ay esté lieutenant des roys en grandes armées, dedans et dehors ce royaume , ayant commandement sur les finances, dont je signois les roolles, et expédioys les acquits; qui n'estoit seing de petite importance; mais je ne les ay employeez que pour le service du roy, sans jamais en appliquer rien au profit de moy ny des miens. J'ay esté quelquefois contraint d'user d'un peu de sévéritez, comme en Lombardie, de faire mourir des hommes pour peu d'occasion, pour avoir seulement prins un pain ou un morceau de lard, qui estoient rigueurs nécessaires pour la guerre, toutefois désagréables à Dieu, dont je sens un fort grand desplaisir, comme d'autres semblables offenses. J'ay esté aussi d'avis qu'on print des biens de l'Église, et qu'on vendist du temporel des bénéfices; mais ce a esté à bonne intention

pour la nécessitez du temps et l'utilité publique, et ay toujours désiré une bonne réformation à l'Église, affm que Dieu y fust mieulx honoré et servy. J'espère que ce bien adviendra en la chrestienté, lorsqu'on verra ceulx qui l'entreprendront porter la marque de vrays et fidelles serviteurs de Dieu. Quant aux dernières armes que j'ay prinses, j'invoque la bonté divine en tesmoignage que je n'y ay esté conduit par aucun intérest particulier, par ambition ny par vengeance, mais seulement pour le zèle et l'honneur de Dieu, pour la vraye religion que j'ay tenu sans fléchir et le service de mon prince, qui sont cause que je meurs présentement, dont je me tiens heureux et remercie de très bon cueur mon Dieu de m'avoir faict tant de grâce. Je vous prie croire que l'inconvénient advenu à ceux de Vassy est advenu contre ma volonté , car je n'y allai oncques avecques intention de leur faire aucune offense. J'ay esté defTendeur, non aggresseur, et quand l'ardeur de ceux qui estoient avec moy, me voyant blessé , leur fit prendre les armes, je fey tout ce que je peu pour parer leurs coups et garder que ce peuple ne receust aucun outrage. J'ai désiré et pourchassé par tous les moyens qu'il m'a esté possible, une bonne paix, et qui ne la désire n'est point homme de bien ny amateur du service du roy, et honny soit qui ne la veult. Je vous prie remonstrer à la royne qu'elle la fasse pour la conservation de son royaume , qui est tant affligé que, s'il demeure quelque temps en ce misérable estât, l'enfant ne pourra hériter aux biens de son père, ni le seigneur soutenir ce qui est sien. Il vaudroit mieulx estre ailleurs beschant la terre, tellement que si Dieu n'y remédie, j'ay pitié de ceulx qui demeurent après moy. Il est vrai que le moyen de la paix est hors de la puissance des hommes, pour les volontez exhorbitantes et les cueurs trop endurciz ; de sorte qu'il fault que ce bien advienne à ce pauvre royaume seulement par la bonté de Dieu. Il nous le donnera quand il en sera temps, et quand nous aurons appaisé son ire par nostre conversion de vie. Il est notre père, et nous sommes ses enfants. Il sçait mieux que nous-mesmes ce qui nous est proufitable. C'est luy de qui il fault attendre toutes bonnes choses ; car le monde n'est plein que de tout mal, de misère et de calamité. Il luy plaist qu'il soit ainsi pour exciter noslre foy, et nous garder de mestre icy nostre fiance. Et vous, mes amys et serviteurs , qui avez prins pour moy tant de peines, je n'ai pas faict beaucoup pour vous; si ay-je fait ce que j'ay peu , et si mieulx je pouvois, je le feroys volontiers. Je vous prie, si la colère m'a quelquefois