LeCinquiemeLivre · 18

yans prudemment couſtoyé le turbillon par l’eſpace d’vn demy iour, au troiſieme ſuiuant nous ſembla l’air plus ſerain, que de couſtume : & en bon ſauuement deſcendiſmes au port de Mateochecnie peu diſtant du palais de la Quinte eſſence. Deſcendans au port trouuaſmes en barbe grand nombre d’archiers & gens de guerre, leſquels gardoient l’Arſenac : de prime arriuee, ils nous feiſrent quaſi peur. Car ils nous feiſrent à tous laiſſer nos armes, & roguement nous interroguerent, diſant, comperes de quels païs eſt la venue ? Conſins, reſpondit Panurge, nous ſommes Tourengeaux. Ores venons de France, conuoiteux de faire reuerence à la dame Quinte eſſence, & viſiter ce treſcelebre royaume d’Entelechie. Que dites vous, interroguent-ils, dites vous Entelechie, ou Endelechie ? Beaux conſins reſpondit Panurge, nous ſommes gens ſimples & idiots, excuſez la ruſticité de noſtre langage, car au demourant les cœurs ſont francs & loyaux. Sans cauſe, dirent ils, nous vous auons ſus ce different interrogez. Car grand nombre d’autres ont icy paſſé de voſtre païs de Touraine, leſquels nous ſembloient bons lourdaux & parloient correct : mais d’autre païs ſont icy venus, ne ſçauons quels outrecuidez, fiers comme Eſcoſſois, qui contre nous à l’entree vouloient obſtinément conteſter : ils ont eſté bien frottez, quoy qu’ils monſtraſſent viſaige rubarbatif. En voſtre monde auez vous ſi grande ſuperfluité de temps, que ne ſçauez en quoy l’employer, fors ainſi de noſtre dame Royne parler, diſputer, & impudentement eſcrire ? Il eſtoit bien beſoin, que Ciceron abandonnaſt ſa Republique, pour s’en empeſcher, & Diogenes Laertius, & Theodorus Gaza, & Argyropile, & Beſſarion, & Politian, & Bude, & Laſcaris, & tous les diables de ſages fols : le nombre deſquels n’eſtoit aſſez grand, s’il n’euſt eſté recentement accreu par Scaliger, Brigot, Chambrier, François Fleury, & ne ſçay quels autres tels ieunes haires eſmouchetez. Leur male angine, qui leur ſuffocaſt le gorgeron avec l’epiglotide. Nous les… Mais quoy diantre, ils flattent les diables, diſoit Panurge entre les dents, vous icy n’eſtes venus pour en leur folie les ſouſtenir, & de ce n’auez procuration : plus auſſi d’iceux ne vous parlerons. Ariſtoteles prime homme, & paragon de toute philoſophie, fut parrin de noſtre dame Royne : il treſbien, & proprement la nomma Entelechie : Entelechie eſt ſon vray nom. S’aille chier, qui autrement la nomme. Qui autrement la nomme erre par tout le Ciel. Vous ſoyez les treſbien venus. Nous preſenterent l’accollade : nous en feuſmes tous reſiouys.

Panurge me diſt en l’aureille, compagnon as tu rien eu peur en ceſte premiere boutee ? Quelque peu, reſpondy-ie. I’en ay, diſt-il, plus eu, que iadis n’eurent les ſoldats d’Ephrain, quand par les Galaadites feurent occis & noyez pour en lieu de Schibboleth dire Sibboleth. Et n’y a homme, pour tous taire, en Beauce, qui bien ne m’euſt auec vne charrete de foin eſtouppé le trou du cul.

Depuis nous mena le Capitaine au Palais de la Royne en ſilence, & grandes ceremonies. Pantagruel luy vouloit tenir quelque propos, mais ne pouuant monter ſi haut, qu’il eſtoit, ſouhaitoit vne eſchelle, ou des eſchaſſes bien grandes. Puis diſt, Baſte, ſi noſtre dame Royne vouloit, nous ſerions auſſi grans comme vous. Ce ſera quant il luy plaira. Par les premieres galleries rencontraſmes grand tourbe de gens malades, leſquels eſtoient inſtallez diuerſement, ſelon la diuerſité des maladies : les ladres à part, les empoiſonnez en vn lieu, les peſtiferez ailleurs, les verolez en premier rang : ainſi de tous autres.