LeCinquiemeLivre · 19

n la ſeconde gallerie nous feut par le Capitaine monſtré la dame ieune, & ſi auoit dixhuict cens ans pour le moins, belle, delicate, veſtue gorgiaſement, au milieu de ſes damoiſelles, gentils-hommes. Le Capitaine nous dit, heure n’eſt de parler à elle, ſoyez ſeulement ſpectateurs attentifs, de ce qu’elle faict. Vous en voſtre Royaume auez quelques Roys, leſquels phantaſtiquement guariſſent d’aucunes maladies, comme ſcrophules, mal-ſacré, fiebures quartes, par ſeule appoſition des mains. Ceſte noſtre Royne de toutes maladies guariſt, ſans y toucher, ſeulement leur ſonnant vne chanſon ſelon la competance du mal. Puis nous monſtra les orgues, deſquelles ſonnant faiſoit ces admirables guariſons. Icelles eſtoient de façon bien eſtrange. Car les tuyaux eſtoient de caſſe en canon, le ſommier de gaiac, les marchettes de rubarbe, le ſuppied de turbith, le clauier de ſcammonie.

Lors que conſiderions ceſte admirable & nouuelle ſtructure d’orgues, par ſes Abſtracteurs, Spodizateurs, Maſſiteres, Preguſtes, Tabachins, Chachanins, Neemanins, Rabrebans, Nereins, Rozuins, Nedibins, Nearins, Segamions, Perazons, Chefinins, Sarins, Socrins, Aboth, Enilins, Archaſdarpenins, Mebins, Giborins & autres ſiens officiers, furent les lepreux introduits, elle leur ſonna vne chanſon, ie ne ſçay quelle, ſoudain furent & parfaictement guaris. Puis furent introduits les empoiſonnez, elle leur ſonna vne autre chanſon, & gens de bout. Puis les aueugles, les ſourds, les muets, leurs appliquant de meſme. Ce que nous eſpouuenta non à tord, & tombaſmes en terre, nous proſternans, comme gens ecſtaſtiques, & rauis en contemplation exceſſiue, & admiration des vertus, qu’auons veu proceder de la dame. Et ne fut en noſtre pouuoir mot aucun dire. Ainſi reſtions en terre, quant elle touchant Pantagruel d’vn bouquet de roſe franche, lequel elle tenoit en main, nous reſtitua le ſens, & fiſt tenir en pieds. Puis nous diſt en parolles byſſines, telles, que vouloit Paryſatis qu’on proferaſt parlant à Cyrus ſon fils : ou pour le moins de taffetas armoiſi.

L’honeſteté ſcintilante, en la circonferance, iugement certain me fait, de la vertu latente au ventre de vos eſprits : & voyant la ſuauité melliflue de vos diſertes reuerences, facilement me perſuade le cœur voſtre ne patir vice aucun, n’aucune ſterilité de ſauoir liberal, & hautain, ains abonder en pluſieurs peregrines & rares diſciplines : leſquelles à preſent plus eſt facile par les vſages communs du vulgaire imperit deſirer, que rencontrer : c’eſt la raiſon pourquoy, ie dominante par le paſſé à toute affection priuee, maintenant contenir ne me peux, vous dire mot triuial au monde, c’eſt que ſoyez les biens, les plus, les treſques bien venus.

Ie ne ſuis poinc clerc, me diſoit ſecretement Panurge, reſpondez ſi voulez : ie toutesfois ne reſpondis, non fiſt Pantagruel : & demeurions en ſilence. Adonques diſt la Royne : En ceſte voſtre taciturnité congnoy-ie, que non ſeulement eſtes iſſus de l’eſchole Pythagorique. de laquelle print racine, en ſucceſſiue propagation, l’antiquité de mes progeniteurs : mais auſſi, que en Egypte, celebre officine de haute philoſophie, mainte lune retrograde, vos ongles mords auez, & la teſte d’vn doigt grattee. En l’eſchole de Pythagoras, taciturnité, de congnoiſſance eſtoit ſymbole : & ſilence des Egyptiens recongnu eſtoit en louange deifique : & ſacrifioient les Ponteſes en Hieropolis au grand Dieu en ſilence, ſans bruit faire, ne mot ſonner. Le deſſein mien eſt, n’entrer vers vous en priuation de gratitude, ains par viue formalité encores que maniere ſe vouluſt de moy abſtraire, vous excentriquer mes penſees.

Ces propos acheuez, dreſſa ſa parolle vers ſes officiers, & ſeulement leur diſt, Tabachins à Panacee. Sus ce mot, les Tabachins nous dirent, qu’euſſions la dame Royne pour excuſee, ſi auec elle ne diſnions. Car à ſon diſner rien ne mangeoit, fors quelques Cathegories, Iecabots, Eminins, Dimions, Abſtractions, Harhorins, Chelimins, Secondes intentions, Caradoth, Antitheſes, Metempſichoſies, tranſcendentes Prolepſies.

Puis nous menerent en vn petit cabinet, tout contrepointé d’allarmes. Là fuſmes traictez, dieu ſçait comment. On dict que Iupiter en la peau diphthere de la cheure, qui l’allaicta en Candie, de laquelle il vſa, comme de pauois, combatans les Titanes, pourtant eſt-il ſurnommé Eginchus, eſcrit tout, ce que lon fait au monde. Par ma fov, Beuueurs mes amis, en dixhuict peaux de cheures, on ne ſauroit, les bonnes viandes qu’on nous ſeruit, les entremets, & bonne chere, qu’on nous fiſt, deſcrire : voire fuſt-ce en lettres auſſi petites, que dit Ciceron auoir veu l’Iliade d’Homere, tellement qu’on la couuroit d’vne coquille de noix. De ma part encores que i’euſſe cent langues, cent bouches, & la voix de fer, la copie melliflue de Platon, ie ne ſaurois en quatre liures vous en expoſer la tierce d’vne ſeconde. Et me diſoit Pantagruel, que, ſelon ſon imagination, la dame à ſes Tabachins diſant, à Panacee, leur donnoit le mot ſymbolique entre eux de chere ſouueraine, comme en Apollo diſoit Luculle, quant feſtoyer vouloit ſes amis ſingulierement, encores qu’on le print à l’improuiſte, ainſi que quelques fois faiſoient Ciceron & Hortenſius.

Non, mihi si linguæ centum sint, oraque centum,
Ferrea vox…
Omnia pœnarum percurrere nomina possim.

(Virgile, Énéide, VI, 625)