LeCinquiemeLivre · 20

e diſner paracheué fuſmes par vn Chachanin menez en la ſalle de la Dame, & veiſmes comment ſelon ſa couſtume, apres le paſt, elle accompagnee de ſes damoiſelles, & Princes de ſa Cour, ſaſſoit, tamiſſoit, belutoit, & paſſoit le temps auec vn beau & grand ſas de ſoye blanche & bleuë. Puis apperçeu que reuoquans l’antiquité en vſage ils iouerent enſemble aux

Cordace
Emmelie
Sicinnie
Iambicques
Perſicque
Phrygie
Nicatiſme
Thracie
Calabriſme
Moloſſicque
Cernophore

Mongas
Thermanſtrie
Florule
Pyrricque, & mille autres danſes.

Depuis par ſon commandement viſitaſmes le Palais, & viſmes choſes tant nouuelles, admirables & eſtranges, qu’y penſant ſuis encores tout rauy en mon evprit. Rien toutesfois plus par admiration ne ſubuertit nos ſens, que l’exercice des gentils-hommes de ſa maiſon, Abſtracteurs, Perazons, Nedibins, Spodizateurs, & autres, leſquels nous dirent franchement, ſans diſſimulation, que la dame Royne faiſoit tout impoſſible & guariſſoit les incurables. Seulement eux, ſes officiers, faiſoient, & guariſſoient le reſte.

Là ie vy vn ieune Parazon guarir les verolez ie dy de la bien fine, comme vous diriez de Rouen, ſeulement leur touchant la vertebre dentiforme d’vn morceau de ſabot par trois fois.

Vn autre ie vy hydropiques parfaitement guarir, tympaniſtes, aſcites, & hypoſargues, leur frappant par neuf fois ſur le ventre d’vne bezaſſe Tenedie, ſans ſolution de continuité.

Vn guariſſoit de toutes fiebures ſur l’heure, ſeulement leurs pendant à la cinture, ſus le coſté gauche vne queuë de Renard.

Vn du mal des dents, ſeulement lauant par trois fois la racine de la dent affligee, auec vinaigre ſuzat, & au ſoleil par demye heure la laiſſant deſſeicher.

Vn autre, toute eſpece de goutte, fuſt chaude, fuſt froide, fuſt pareillement naturelle, fuſt accidentalle : ſeulement faiſant es goutteux clorre la bouche, & ouurir les yeux.

Vn autre ie vy, lequel en peu d’heure guariſt neuf bons gentilſhommes du mal ſainct François, les oſtant de toutes debtes & à chaſcun d’eux mettant vne corde au col, à laquelle pendoit vne boitte pleine de dix mille eſcus au ſoleil.

Vn autre, par engin mirifique iettoit les maiſons par les feneſtres : ainſi reſtoient emundees d’air peſtilent.

Vn autre guariſſoit toutes les trois manieres d’hetiques atrophes, tabides, emaciez, ſans bains, ſans laict Tabian, ſans dropace, pication, n’autre medicament. Seulement les rendant moynes par trois mois. Et m’affermoit que ſi en eſtat Monachal ils n’engraiſſoient, ne par art, ne par nature iamais n’engreſſeroient.

Vn autre vy accompagné de femmes, en grand nombre, par deux bandes, l’vne eſtoit de ieunes fillettes, ſaffrettes, tendrettes, blondettes, gratieuſes, & de bonne volonté, ce me ſembloit : l’autre de vieilles edentees, chaſſieuſes, riddees, bazanees, cadauereuſes. Là fut dit à Pantagruel, qu’il refondoit les vieilles, les faiſant ainſi reieunir, & telles par ſon art deuenir, qu’eſtoient les fillettes là preſentes, leſquelles il auoit ceſtuy iour reffondues, & entierement remiſes en pareille beauté, forme, elegance, grandeur, & compoſition des membres, comme eſtoient en l’aage de quinze & ſeize ans, excepté ſeulement les talons, leſquels leurs reſtent trop plus courts que n’auoyent en leur premiere ieuneſſe. Cela eſtoit la cauſe pourquoy elles d’orenauant à toutes rencontres d’hommes ſeront mout ſubiettes & faciles à tomber à la renuerſe. La bande des vieilles attendoit l’autre fournee en grande deuotion, & l’importunoient en toute inſtance, alleguans que choſe eſt en nature intolerable, quant beauté faut à cul de bonne volonté. Et auoit en ſon art pratique continuelle, & gain plus que mediocre. Pantagruel interroguoit, ſi par fonte pareillement faiſoit les hommes vieux reieunir : reſpondu luy fut, que non. Mais la maniere d’ainſi reieunir eſtre, par habitation auec femme refondue : car là on prenoit ceſte quinte eſpece de verole nommee la Pellade, en grec Ophiaſis, moyennant laquelle on change de poil & de peau, comme font annuellement les Serpens, & en eux eſt ieuneſſe renouuellee, comme au Phenix d’Arabie. C’eſt la vraye Fontaine de ieuneſſe. Là ſoudain, qui vieux eſtoit & decrepit, deuient ieune, alaigre, & diſpos. Comme dit Euripides eſtre aduenu à Iolaus, comme aduint au beau Phaon tant aimé de Sappho, par le benefice de Venus, à Thithone, par le moyen d’Aurore, à Eſon par l’art de Medee, & à Iaſon pareillement, qui ſelon le teſmoignage de Pherecides & de Simonides, fut par icelle reteint & reieuny : & comme dit Eſchilus eſtre aduenu es nourriſſes du bon Bacchus, & à leurs maris auſſi.

Vous ſeriez en peu d’heure femme.

C’eſt…
… Grand pitié quand beauté fault
A cul de bonne volonté.

(Marot, Epiſtre du Coq à l’aſne, II)