LeCinquiemeLivre · 26

epvis paſſaſmes l’Iſle des Eſclots leſquels ne viuent que de ſouppes de merlus, fuſmes toutesfois bien recuillis & traitez du Roy de l’Iſle nommé Benius tiers de ce nom, lequel apres boire nous mena voir vn monaſtere nouueau fait erigé & baſty par ſon inuention pour les freres Fredons, ainſi nommoit il ſes religieux. Diſant qu’en terre ferme habitoient les freres petits ſeruiteurs & amis de la douce dame. Item les glorieux & beaux freres mineurs, qui ſont ſemibriefs de bulles, les freres minimes haraniers, enfumez, les auſſi freres minimes crochus, & que du nom plus diminuer ne pouuoit qu’en fredons. Par les ſtatus & bulle pattente obtenue de la Quinte, laquelle eſt de tous bon accords, ils eſtoient tous habillez, en bruſleurs de maiſons excepté qu’ainſi que les couureurs de maiſons en Aniou ont les genoux contrepointez, ainſi auoient ils les ventres carrelez, & eſtoient les carreleurs de ventre en grande reputation parmy eux. Ils auoient la braguette de leurs chauſſes à forme de pantoufle & en portoient chaſcun deux, l’vne deuant & l’autre derriere couſue, affermans par ceſte duplicité braguatine quelques certains & horrifiques miſteres eſtre duement repreſentez. Ils portoient ſouliers ronds comme baſſins à l’imitation de ceux qui habitent la mer areneuſe : du demourant auoient barbe raſe & pieds ferrats. Et pour monſtrer que de fortune ils ne ſe ſoucient il les faiſoit raire & plumer comme cochons la partie poſterieure de la teſte depuis le ſommet iuſques aux omoplates. Les cheueux en deuant depuis les os bregmatiques croiſſoient en liberté. Ainſi contrefortunoient comme gens aucunement ne ſe ſoucians des biens qui ſont au monde. Deffians dauantage fortune la diuerſe portoient non en main comme elle, mais à la ceincture en guiſe de patenoſtres chaſcun vn raſouer tranchant lequel ils eſmouloient deux fois de iour & affiloient trois fois de nuict. Deſſus les pieds chaſcun portoit vne boulle ronde : parce qu’eſt dit fortune en auoir vne ſoubs ſes pieds. Le cahuet de leurs ſcaputions eſtoit deuant attaché, non derriere : en ceſte façon auoient le viſaige caché, & ſe moquoient en liberté, tant de fortune, comme des fortunez : ne plus ne moins, que font nos damoiſelles, quant c’eſt qu’elles ont leur cache-laid, que vous nommez touret de nez, les anciens le nomment chareté. Parce qu’il couure en elles de pechez grande multitude. Auoient auſſi touſiours patente la partie poſterieure de la teſte comme nous auons le viſaige : cela eſtoit cauſe, qu’ils alloient de ventre ou de cul, comme bon leur ſembloit. S’ils alloient de cul, vous euſſiez eſtimez eſtre leur alleure naturelle : tant à cauſe des ſouliers ronds, que de la braguette precedente. La face auſſi derriere raſe & peinte rudement, auec deux yeux vne bouche, comme vous voyez és nois indiques. S’ils alloient de ventre, vous euſſiez penſé que fuſſent gens iouans au chapifou. C’eſtoit belle choſe de les voir.

Leur maniere de viure eſtoit telle. Le clair lucifer commençant apparoiſtre ſus terre, ils s’entrebottoient, & eſperonnoient l’vn l’autre, par charité. Ainſi bottez & eſperonnez dormoient, ou ronfloient pour le moins : & dormans auoient bezicles au nez, ou lunettes pour pire.

Nous trouuions ceſte façon de faire eſtrange : mais ils nous contenterent en la reſponſe : nous remonſtrans que le iugement final, lors que ſeroit, les humains prendroient repos & ſommeil, pour donques euidentement monſtrer, qu’ils ne reffuſoient y comparoiſtre, ce que font les fortunez, ils ſe tenoient bottez, eſperonnez, & preſts à monter à cheual, quant la trompette ſonneroit.

Midy ſonnant (notez que leurs cloches eſtoient, tant de l’horloge, que de l’Egliſe, & refectoir, faictes, ſelon la diuiſe Pontiale, ſauoir eſt, de fin dumet contrepointé, & le batail eſtoit d’vne queue de renard) Midy donques ſonnant ils s’eueilloient & deſbottoient, piſſoient qui vouloit, & eſmoutiſſoient, qui vouloit, eſternuoient, qui vouloit. Mais tous par contrainte, ſtatut rigoureux, amplement & copieuſement baiſſoient, ſe deſieunoient de bailler. Le ſpectacle me ſembloit plaiſant : car leurs bottes & eſperons mis ſur vn raſtelier, ils deſcendoient aux cloiſtres, là ſe lauoient curieuſement les mains & la bouche, puis s’aſſeoient ſus vne longue ſelle, & ſe curoient les dens iuſques à ce que le Preuoſt fiſt ſigne, ſifflant en paume : lors chaſcun ouuroit la gueule tant qu’il pouuoit, & baailloient aucunefois demie heure, aucunefois plus, aucunefois moins, ſelon que le Prieur iugeoit le deſiuner eſtre proportionné à la feſte du iour, apres cela faiſoient vne belle proceſſion : en laquelle ils portoient deux bannieres, en l’vne deſquelles eſtoit en belle peinture le pourtrait de vertu, en l’autre de fortune. Vn fredon premier portoit la banniere de fortune, apres luy marchoit vn autre portant celle de vertu, en main tenant vn aſperſoir mouillé en eau mercuriale, deſcrite par Ouide en ſes Faſtes : duquel continuellement il comme fouettoit le precedent Fredon, portant fortune. Ceſt ordre, diſt Panurge, eſt contre la ſentence de Ciceron, & des Academiques, leſquels veulent vertu preceder, ſuyure fortune. Nous fut toutesfois remonſtré qu’ainſi leur convenoit il faire, puis que leur intention eſtoit fuſtiguer fortune. Durant la proceſſion ils fredonnoient entre les dents melodieuſement ne ſcay quelles antiphones : car ie n’entendois leur patelin, & ententiuement eſcoutant apperçeu qu’ils ne chantoient que des aureilles. O la belle armonie, & bien concordante au ſon de leurs cloches : iamais ne les voirrez diſcordans. Pantagruel fiſt vn notable mirifique ſus leur proceſſion. Et nous diſt, auez vous veu & noté la fineſſe de ces fredons icy ? Pour parfaire leur proceſſion, ils ſont ſortis par vne porte de l’egliſe, & ſont entrez par l’autre. Ils ſe ſont bien gardez d’entrer par où ils ſont yſſus. Sus mon honneur ce ſont quelques fines gens, ie dy fins à dorer, fins comme vne dague de plomb, fins non affinez, mais affinans, paſſez par eſtamine fine. Ceſte fineſſe, diſt frere Iehan, eſt extraicte d’occulte Philoſophie, & n’y entends, au diable, le rien. D’autant, reſpondit Pantagrael, eſt-elle plus redoutable, que lon n’y entend rien. Car fineſſe entendue, fineſſe preueuë, fineſſe deſcouuerte perd de fineſſe & l’eſſence & le nom : nous la nommons lourderie. Sur mon honneur qu’ils en ſauent bien d’autres. La proceſſion acheuee, comme pourmenement & exercitation ſalubre, ils ſe retiroient en leur refectoir, & deſſous les tables ſe mettoient à genoux, s’appuyans la poictrine & ſtomach, chaſcun ſus vne lanterne : Eux eſtans en ceſt eſtat, entroit vn grand Eſclot, ayant vne fourche en main, & là les traitoit à la fourche : de ſorte qu’ils commençoient leur repas, par fourmage, & l’acheuoient par mouſtarde & laictue, comme teſmoigne Martial, auoir eſté l’vſage des Anciens. En fin on leur preſentoit à chaſcun d’eux vne platelee de mouſtarde, & eſtoient ſeruis de mouſtarde apres diſner. Leur diette eſtoit telle : Au dimanche ils mangeoient boudins, andouilles, ſauciſſons, fricandeaux, haſtereaux, caillettes, exceptez touſiours le fourmage d’entree, & mouſtarde pour l’iſſue. Au lundy, beaux pois au lard, auec ample comment, & gloſe interlineare. Au mardy, force pain beniſt, fouaces, gaſteaux, galettes biſcuites. Au mecredy, ruſtrerie, ce ſont belles teſtes de mouton, telle de veau, telle de bedouaux, leſquelles abondent en icelle contree. Au ieudy, potages de ſept ſortes, & mouſtarde eternelle parmy. Au vendredy, rien que cormes, encores n’eſtoient-elles trop meures, ſelon que iuger ie pouuois à leur couleur. Au ſamedy, rongeoient les os, non pourtant eſtoient-ils pauures ne ſouffreteux : car vn chaſcun d’eux auoit benefice de ventre, bien bon. Leur boire eſtoit vn antifortunal, ainſi appelloient-ils ne ſcay quel bruuage du pays. Quant ils vouloient boire ou manger, ils rabbatoient leurs cahuets de leurs ſcaputions par le deuant, & leur ſeruoit de bauiere. Le diſner paracheué, ils prioient Dieu tresbien, & tout par fredons : le reſte du iour, attendans le iugement final, ils s’exerçoient à œuure de charité. Au dimanche, ſe pelaudans l’vn l’autre. Au lundy, s’entrenarzardans. Au mardy, s’entre eſgratignans. Au mecredy, s’entremouchans. Au ieudy, s’entretirans les vers du nez. Au vendredy, s’entrechatouillans. Au ſamedy, s’entrefouettans. Telle eſtoit leur diette, quand ils reſidoient en couuent, ſi par commandement du Prieur clauſtral ils iſſoient hors, defenſe rigoureuſe, ſur peine horrifique, leur eſtoit faite, poiſſon lors ne toucher, ne manger, qu’ils ſeroient ſur mer ou riuiere : ne chair, telle qu’elle fuſt, lors que ils ſeroient en terre ferme : afin qu’à vn chaſcun fuſt euident qu’en iouyſſans de l’obiet, ne iouyſſoient de la puiſſance & concupiſcence, & ne s’en eſbranloient non plus que le roc Marpeſian, le tout faiſoient auec antiphones competentes & à propos, touſiours chantans des aureilles, comme auons dit. Le ſoleil ſoy couchant en l’Ocean, ils bottoient & eſperonnoient l’vn l’autre, comme deuant, & bezicles au nez, ſe compoſoient à dormir. A la minuit l’Eſclot entroit & gens debout : là eſmailloient & affilloient leurs raſouers : & la proceſſion faite, mettoient les tables ſus eux, & repaiſſoient comme deuant. Frere Iehan des antomeures voyant ces ioyeux freres fredons, & entendant le contenu de leurs ſtatuts, perdit toute contenance : & s’eſcriant hautement, diſt, O le gros rat à la table, ie romps ceſtuy là, & m’en vois par dieu, de pair. O que n’eſt icy Priapus auſſi bien que fuſt aux ſacres nocturnes de Canidie, pour le veoir à plein ſond peder, & contrepedant fredonner. A ceſte heure congnois-ie en verité, que ſommes en terre Anticthone & Antipode. En Germanie lon demoliſt monaſteres & deffroque-on les Moynes, icy on les erige à rebours, & à contrepoil.

Est aqua Mercurii portæ vicina Capenæ.

Claudere quæ cœnas lactuca solebat avorum,
Die mihi, cur nostras inchoat illa dapes ?

(Épigrammes, liv. XIII, 14)

Nec magis incepto vultum sermone movetur
Quam si dura silex aut stet Marpesia cautes.

(Virgile, Énéide, VI, 470)

Nam, displosa sonat quantum vesica, pepedi,
Diffissâ nate, ficus.

(Horace, Satires, I, VIII, 46)