LeCinquiemeLivre · 28

vez vous, diſt Epiſtemon, noté comment ce meſchant & malautru Fredon nous a allegué Mars comme mois de ruffiennerie ? Ouy, reſpondit Pantagruel, toutesfois il eſt touſiours en quareſme, lequel a eſté inſtitué, pour macerer la chair, mortifier les appetits ſenſuels, & referrer les furies veneriennes. En ce, diſt Epiſtemon, pouuez vous iuger, de quel ſens eſtoit celuy Pape qui premier l’inſtitua, que ceſte vilaine ſauatte de fredon confeſſe ſoy n’eſtre iamais plus embrené en paillardiſe, qu’en la ſaiſon de quareſme : auſſi par les euidentes raiſons produites de tous bons & ſçauans medecins, affermans, en tout le decours de l’Annee, n’eſtre viandes mangees plus excitantes la perſonne à lubricité, qu’en celluy temps : febues, poix, phaſeols, chiches, oignons, noix, huytres, harans, ſaleures, garon, ſalades toutes compoſees d’herbes veneriques : comme eruce, naſitord, targon, creſſon, berle, reſponſe, pauot cornu, haubelon, figues, ris, raiſins. Vous, diſt Pantagruel, ſeriez bien eſbahy, ſi voyant le bon Pape, inſtituteur du Sainct quareſme, eſtre lors la ſaiſon, quand la chaleur naturelle ſort du centre du corps, auquel s’eſtoit contenue durant les froidures de l’hyuer, & ſe diſpert par la circonference des membres, comme la ſeſue faict es arbres, auroit ces viandes, qu’auez dictes, ordonnees, pour aider à la multiplication de l’humain lignage. Ce que me l’a faict penſer eſt qu’au papier baptiſtere de Touars, plus grand eſt le nombre des enfans en Octobre & Nouembre nez, qu’es dix autres mois de l’Annee, leſquels ſelon la ſupputation retrograde, tous eſtoient faits, conceus, & engendrez en quareſme. Ie, diſt frere Iean, eſcoute vos propos, & y prens plaiſir non petit : mais le Curé de Iambet attribuoit ce copieux engroſſiſſement de femmes non aux viandes de quareſme, mais aux petits queſteurs voultés, aux petits preſcheurs bottés, aux petits confeſſeurs crottés : leſquels damnent, par ceſtuy temps de leur empire, les ribaulx mariez trois toiſes au deſoubs des griſes de Lucifer. A leur terreur les mariez plus ne biſcotent leurs chambrieres, ſe retirent à leurs femmes : i’ay dict. Interpretez, diſt Epiſtemon, l’inſtitution de quareſme à voſtre phantaſie : chaſcun abonde en ſon ſens : mais à la ſuppreſſion d’iceluy, laquelle me ſemble eſtre impendente, s’oppoſeront tous les medecins : ie le ſçay, ie leur ay ouy dire. Car ſans le quareſme ſeroit leur art en meſpris, rien ne gaigneroient, perſonne ne ſeroit malade. En quareſme ſont toutes maladies ſemees : c’eſt la vraye pepiniere, la naifue couche, & promoconde de tous maux : encores ne conſiderez que ſi quareſme faict les corps pourrir, auſſi faict il les ames enrager. Diables à lors font leurs efforts, Caffards alors ſortent en place, Cagots tiennent leurs grands iours : forces ſeſſions, ſtacions, perdonnances, confeſſions, fouettements, anathematiſations. Ie ne veux pourtant inferer que les Arimaſpians ſoient en cela meilleurs que nous : mais ie parle à propos. Orça, diſt Panurge, couillon cultant & fredonnant, que vous ſemble de ceſtuy-cy, eſt-il pas heretique ? Fr. tres. Pan. doibt il pas eſtre bruſlé ? Fr. doibt. Pan. & le pluſtoſt qu’on pourra ? Fr. ſoit. Pan. ſans le faire pourboullir ? Fr. ſans. Pan. en quelle maniere donques ? Fr. vif. Pan. ſi qu’en fin s’en enſuyue ? Fr. mort. Pan. car il vous a trop faſché ? Fr. las. Pan. que vous ſembloit il eſtre ? Fr. fol. Pan. vous dictes fol ou enragé ? Fr. plus. Pan. que voudriez vous qu’il fuſt ? Fr. ars. Pan. on en a brullé d’autres ? Fr. tant. Pan. qui eſtoient heretiques ? Fr. moins. Pan. encores en bruſlera on ? Fr. maints. Pan. les rachepterez vous ? Fr. grain. Pan. les faut il pas tous bruſler ? Fr. faut. Ie ne ſçay, diſt Epiſtemon, quel plaiſir vous prenez, raiſonnant auecques ce meſchant penaillon de moyne : mais ſi d’ailleurs ne m’eſtiez congnu, vous me creeriez en l’entendement opinion de vous peu honorable. Allons de par Dieu, diſt Panurge, ie l’emmenerois volontiers à Gargantua tant il me plaiſt : quand ie ſeray marié il ſeruiroit à ma femme de foul. Voire teur, diſt Epiſtemon, par la figure de Tmeſis. A ceſte heure, diſt frere Iehan, en riant, as tu ton vin, pauure Panurge, tu n’eſchappe iamais que tu ne ſois cocu iuſques au cul.