LeCinquiemeLivre · 30

assans quelque peu auant en ce pays de tapiſſerie, viſmes la mer mediterranee, ouuerte & deſcouuerte iuſques aux abiſmes, tout ainſi comme au gouffre Arabic ſe deſcouurit la mer Erichree, pour faire chemin aux Iuifs iſſans d’Egypte. Là ie recongnu Triton ſonnant de ſa groſſe conche, Glaucus, Proteus, Nereus, & mille autres dieux & monſtres marins. Viſmes auſſi nombre infiny de poiſſons en eſpeces diuerſes, danſans, volans, voltigeans, combatans, mangeans, reſpirans, belutans, chairans, dreſſans eſcarmouches, faiſans embuſcades, compoſans trefues, marchandans, iurans, s’eſbatans. En vn coing là pres viſmes Ariſtoteles tenant vne lanterne, en ſemblable contenance que lon peint Thermite pres ſainct Chriſtofle, eſpiant, conſiderant, le tout redigeant par eſcrit. Derriere luy eſtoient, comme records de ſergents, pluſieurs autres Philoſophes, Appianus, Heliodorus, Atheneus, Porphirius, Pancrates, Archadian, Numenius, Poſſidonius, Ouidius, Oppianus, Olympius, Seleucus, Leonides, Agathocles, Theophraſte, Damoſtrate, Mutianus, Nymphodorus, Elianus, cinq cens autres gens, auſſi de loiſir comme fuſt Chryſippus, ou Ariſtarchus de Sole, lequel demeura cinquante huit ans à contempler l’eſtat des abeilles, ſans autre choſe faire. Entre iceux i’y aduiſay Pierre Gylles lequel tenoit vn vrinal en main, conſiderant en profonde contemplation l’vrine de ces beaux poiſſons. Auoir longuement conſideré ce pays de Satin, diſt Pantagruel, i’ay icy longuement repeu mes yeux, mais ie ne m’en peux en rien ſaouler : mon eſtomach brait de male rage de faim, repaiſſons, repaiſſons, di-ie, & taſtons de ces anacampſerotes qui pendent là deſſus. Fy ce n’eſt rien qui vaille. Ie donques prins quelques mirobalans qui pendoient à vn bout de tapiſſerie : mais ie ne les peu maſcher n’aualler, & les gouſtans euſſiez proprement dict & iuré que fuſt ſoye retorſſe, & n’auoient ſaueur aucune. On penſeroit qu’Heliogabalus là euſt prins comme tranſſump de bulle, forme de feſtoyer ceux qu’il auoit long temps fait iuſner, leur promettant en fin banquet ſomptueux, abondant, Imperial, puis les paiſſoit de viandes en cire, en marbre, en potterie, en peintures & nappes figurees. Cerchans donques par ledit pays ſi viandes aucunes trouuerions, entendiſmes vn bruit ſtrident & diuers, comme ſi fuſſent femmes lauant la buee, ou traquets de moulins du bazacle lez Toloſe, ſans plus ſeiourner nous tranſportaſmes au lieu où c’eſtoit, & viſmes vn petit vieillard, boſſu, contrefait & monſtrueux, on le nommoit Ouy-dire, il auoit la gueule fendue iuſques aux aureilles, & dedans la gueule ſept langues, & la langue fendue en ſept parties, quoy que ce fuſt, de toutes ſept enſemblement parloit diuers propos langages diuers, auoit auſſi parmy la teſte & le reſte du corps autant d’aureilles comme iadis eut Argus d’yeux, au reſte eſtoit aueugle & paralitique des iambes : au tour de luy ie vy nombre innumerable d’hommes & de femmes eſcoutans & attentifs, & en recongnu aucuns parmy la trouppe faiſans bon minois, d’entre leſquels vn pour lors tenoit vne Mappemonde, & la leur expoſoit ſommairement par petites aphoriſmes, & y deuenoient clercs & ſcauans en peu d’heure, & parloient de prou de choſes prodigieuſes elegantement, & par bonne memoire pour la centieſme partie deſquelles ſcauoir ne ſuffiroit la vie de l’homme, des Pyramides, du Nil, de Babylone, des Troglodites, des Hymantopodes, des Blemmies, des Pygmees, des Canibales, des monts Hyperborees, des Egipanes, de tous les diables, & tout par Ouy-dire. Là ie vy ſelon mon aduis, Herodote, Pline, Solin, Beroſe, Philoſtrate, Mela, Strabo, & tant d’autres antiques, plus Albert le Iacobin grand, Pierre Teſmoin, Pape Pie ſecond, Volateran, Paulo Iouio le vaillant homme, Iaques Cartier, Charton Armenian, Marc Paule Venitien, Ludouic Romain, Pietre Aliares, & ne ſcay combien d’autres modernes hiſtoriens cachez derriere vne piece de tapiſſerie en tapinois eſcriuans de belles beſongnes, & tout par Ouy-dire.

Derriere vne piece de velours figuré à fueille de menthe, pres d’Ouy-dire, ie vy nombre grand de Percherons & Mançeaux bons eſtudians, ieunes aſſez : & demandans en quelle faculté ils appliquoient leur eſtude, entendiſmes que là de ieuneſſe ils apprenoient eſtre teſmoins, & en ceſtuy art proufitoient ſi bien, que, partans du lieu, & retournez en leur prouince, viuoient honneſtement du mellier de teſmoignerie : rendans ſeur teſmoignage de toutes choſes à ceux, qui plus donneroient par iournee, & tout par ouy-dire. Dictes-en ce que voudrez, mais ils nous donnerent de leur chanteaux, & beuſmes à leurs barils, à bonne chere. Puis nous aduertirent cordialement, qu’euſſions à eſpargner verité, tant que poſſible nous ſeroit, ſi voulions paruenir en Court de grans Seigneurs.

Vn poure Hermite, en riuage eſcarté,
Monſtroit de nuict ſa lumiere & clarté
Au ſainct Geant qui paſſoit la riuiere
Portant l’Auteur de clarté & lumiere.

Vous ſeriez en peu d’heure femme.

Soufflez, penſiez regneront à oultrance,
Mais la mente le bruit hara en tout faict.
Force noiſes, dont maint ſera deffaict,
Croiſtront par gens de mauluais entretien.

(La grand & vraye Prenoſtication. — Anc. poés. t. VI, p. 41)

De mente, penſees, ſoucy,
Aura entre autres violettes,
Et largement verres auſſy
De grans & petites noyſettes.

(La grant & vraye Prenoſtication. — Anc. poés. t. VIII, p. 340)

Un grand homme ſec, là qui me ſert de témoin,
Et qui jure pour moy lors que j’en ay beſoin.

(Racine, Les Plaideurs, I, 6)