LeCinquiemeLivre · 33

ostre noble Lanterne nous eſclairant & conduiſant en toute ioyeuſeté, arriuaſmes en l’Iſle deſiree, en laquelle eſtoit l’oracle de la Bouteille. Deſcendant Panurge en terre fiſt ſur vn pied la gambade en l’air gaillardement, & diſt à Pantagruel : Auiourd’huy auons nous ce que cerchons aueques fatigues & labeurs tant diuers. Puis ſe recommanda courtoiſement à noſtre lanterne : Icelle nous commanda tous bien eſperer, & quelque choſe qui nous apparuſt, n’eſtre aucunement effrayez. Approchans au temple de diue Bouteille nous conuenoit paſſer parmy vn grand vinoble faict de toutes eſpeces de vignes, comme Phalerne, Maluoiſie, Muſcadet, Taige, Beaune, Mireuaux, Orleans, Picardent, Arbois, Couſſi, Anjou, Graue, Corſicque, Vierron, Nerac, & autres. Le dit vinoble fut iadis par le bon Bacchus planté, auec telle benediction, que tous temps il portoit feuille, fleur, & fruict comme les orangiers de Suraine. Noſtre Lanterne magnifique nous commanda manger crois raiſins par homme, mettre du pampre en nos ſouliers, & prendre vne branche verde en main gauche. Au bout du vinoble paſſaſmes deſſous vn arc antique, auquel eſtoit le trophee d’vn beuueur bien mignonnement inſculpé : ſçauoir eſt, en vn lieu long ordre de flaccons, bourraches, bouteilles, fiolles, barils, barraux, pots, pintes, ſemaiſes antiques, pendentes d’vne treille ombrageuſe. En autre grande quantité d’ails, oignons, eſchalottes, iambons, boutargues, parodelles, langues de bœuf fumees, formages vieux, & ſemblable confiture, entrelaſſee de pampre, & en ſemble, par grande induſtrie fagottees auecques des ſeps. En autre cent formes de voerres, comme voerres à pied, & voerres à cheual, cuueaux, retombes, hanaps, iadaux, ſaluernes, taces, gobelets, & telle ſemblable artillerie Bacchique. En la face de l’arc deſſous le zoophore eſtoient ces deux vers inſcripts.

Paſſant icy ceſte poterne
Garny toy de bonne lanterne.

Acela, diſt Pantagruel, auons nous pourueu. Car en toute la region de Lanternois, n’y a lanterne meilleure, & plus diuine, que la noſtre. Ceſtuy arc finiſſoit en vne belle & ample tonnelle, toute faicte de ſeps de vignes, aornez de raiſins de cinq cens couleurs diuerſes, & cinq cens diuerſes formes, non naturelles, mais ainſi compoſees par art d’agriculture, iaunes, bleus, tanez, azurez, blancs, noirs, verds, violets, riolez, piolez, longs, ronds, torangles, couillonnez, couronnez, barbus, cabus, herbus. La fin d’icelle eſtoit cloſe de trois antiques lierres, bien verdoyans, & tous chargez de bagues. Là nous commanda noſtre illuſtriſſime lanterne, de ce lierre chaſcun de nous ſe faire vn chappeau Albanois, & s’en couurir toute la teſte. Ce que fut faict ſans demeure. Deſſous, diſt lors Pantagruel, ceſte treille, n’euſt ainſi iadis paſſé la Pontife de Iupiter. La raiſon, diſt noſtre preclare lanterne, eſtoit myſtique. Car y paſſant auroit le vin, ce ſont les raiſins, au deſſus de la teſte, & ſembleroit eſtre comme maiſtriſee & dominee du vin, pour ſignifier, que les Pontifes & tous perſonnages, qui s’addonnent & dedient à contemplation des choſes diuines, doiuent en tranquillité leurs eſprits maintenir, hors toute perturbation de ſens : laquelle plus eſt manifeſtee en yurognerie, qu’en autre paſſion, quelle que ſoit.

Vous pareillement au temple ne ſeriez receus de la diue Bouteille, eſtans par cy deſſous paſſez, ſinon que Bacbuc la noble Pontife viſt de pampre vos ſouliers plains : qui eſt acte du tout, & par entier diametre contraire au premier, & ſignification euidente, que le vin vous eſt en meſpris, & par vous conculqué & ſubiugué. Ie, diſt frere Iean, ne ſuis point clerc, dont me deſplaiſt : mais ie treuue dedans mon breuiaire, que en la reuelation, fut comme choſe admirable, veuë vne femme, ayant la lune ſous les pieds : c’eſtoit, comme m’a expoſé Bigot, pour ſignifier, qu’elle n’eſtoit de la race & nature des autres, qui toutes ont à rebours la lune en teſte, & par conſequent le cerueau touſiours lunatique : cela m’induit facilement à croire ce que dites, madame lanterne ma mie.