LeCinquiemeLivre · 34

insi deſcendiſmes ſous terre, par vn arceau incruſté de plaſtre, peint au dehors rudement d’vne danſe de femmes & Satyres, accompagnans le vieil Silenus, riant ſus ſon Aſne. Là ie diſois à Pantagruel ceſte entree me reuoque en ſouuenir la caue peinte de la premiere ville du monde : Car là ſont peinctures pareilles, en pareille fraiſcheur comme icy. Où eſt, demanda Pantagruel, qui eſt ceſte premiere ville que dites ? Chinon, di-ie, ou Caynon en Touraine. Ie ſcay, reſpondit Pantagruel, où eſt Chinon, & la caue peinte auſſi, i’y ay beu maints verres de vin frais, & ne fais doute aucune que Chinon ne ſoit ville antique, ſon blaſon l’atteſte, auquel eſt dit deux, ou trois fois, Chinon, petite ville grand renom, aſſiſe ſus pierre ancienne, au haut le bois, au pied Vienne. Mais comment ſeroit elle ville premiere du monde, où le trouuez vous par eſcrit, quelle coniecture en auez ? Ie, dy-ie, trouue en l’Eſcriture Sacree que Cayn fut premier barſiſſeur de villes : vray donques ſemblable eſt, que la premiere, il de ſon nom nomma Cainon, comme depuis ont à ſon imitation tous autres fondateurs, & inſtaurateurs de villes, impoſé leurs noms à icelles. Athene, c’eſt en grec Minerue, à Athenes, Alexandre à Alexandrie, Conſtantin à Conſtantinople, Pompee à Pompeiopolis en Cilicie, Adrian à Adrianople, Canaan aux Cananeens, Saba aux Sabeians, Aſſur aux Aſſyriens, Ptolemaïs, Ceſarea, Tiberium, Herodium en Iudee. Nous tenans ces menus propos ſortit le grand flaſque (noſtre Lanterne l’appelloit Phloſque) gouuerneur de la diue Bouteille, accompagné de la garde du temple, & eſtoient tous Bouteillons François. Iceluy nous voyans Tyrſigeres, comme i’ay dit, & couronnez de Lierre, recognoiſſant auſſi noſtre inſigne Lanterne, nous fiſt entrer en ſeureté, & commanda que droit on nous menaſt à la princeſſe Bacbuc, dame d’honneur de la Bouteille, & Pontife de tous les myſteres. Ce que fut fait.