LeCinquiemeLivre · 35

epvis deſcendiſmes va degré marbrin ſous terre, là eſtoit vn repos : tournans à gauche en deſcendiſmes deux autres, là eſtoit vn pareil repos : puis trois à deſtour, & repos pareil : & quatre autres de meſme. Là demanda Panurge, eſt-ce icy ? Quant degrez, diſt noſtre magnifique lanterne, auez compté ? vn, reſpondit Pantagruel, deux, trois, quatre. Quants ſont ce ? demanda elle, dix, reſpondit Pantagruel. Par, diſt elle, meſme tetrade Pythagorique, multipliez ce, qu’auez reſultant. Ce ſont, diſt Pantagruel, dix, vingt, trente, quarante. Combien fait le tout ? diſt elle. Cent, reſpondit Pantagruel. Adiouſtez, diſt elle, le cube premier, ce ſont huit, au bout de ce nombre fatal, trouuerons la porte du temple. Et y notez prudentement, que c’eſt la vraye Pſycogonie de Platon, tant celebree par les Academiens, & tant peu entendue, de laquelle la moiſtié eſt compoſee d’vnité des deux premiers nombres, plains de deux quadrangulaires & de deux cubiques. Deſcendans ces degrez numereux ſous terre, nous feirent bien beſoin premierement nos iambes, car ſans icelles ne deſcendions qu’en roullant, comme tonneaux en caue baſſe : ſecondement noſtre preclare Lanterne, car en ceſte deſcente ne nous apparoiſſoit autre lumiere, non plus que ſi nous fuſſions au trou de ſainct Patrice en Hybernie, ou en la foſſe de Trophonius en Bëotie. Deſcendus enuiron ſeptante & huit degrez, s’eſcria Panurge, addreſſant ſa parolle à noſtre luyſante lanterne : Dame mirifique, ie vous prie de cœur contrit, retournons arriere : Par la mort bœuf, ie meurs de malle peur. Ie conſens iamais ne me marier : vous auez prins de peine, & fatigue beaucoup pour moy, Dieu vous le rendra en ſon grand rendouer, ie n’en ſeray ingrat iſſant hors ceſte cauerne des Troglodites. Retournons de grace. Ie doubte fort que ſoit icy Tenare, par lequel on deſcend en Enfer, & me ſemble que i’oy Cerberus abbayant. Eſcoutez, c’eſt luy ou les aureilles me cornent : ie n’ay à luy deuotion aucune, car il n’eſt mal des dens ſi grand, que quant les chiens nous tiennent aux iambes. Si c’eſt icy la foſſe de Trophonius, les Lemures & Lutins nous mangeront tous vifs, comme iadis ils mangerent vn des hallebardiers de Demetrius par faute de bribes. Es-tu là, frere Iean ? Ie te prie, mon bedon, tien toy pres de moy, ie meurs de peur. As-tu ton bragmard ? Encores n’ay-ie armes aucunes n’offenſiues ne deffenſiues : Retournons.

I’y fuis, diſt frere Iean, i’y fuis, n’ayes peur ie te tien au collet : dix-huit diables ne t’emporteront de mes mains, encores que fois ſans armes. Armes iamais au beſoin ne faillirent, quant bon cœur eſt aſſocié de bon bras : pluſtoſt armes du Ciel pleuueroient, comme au champs de la Crau, pres les foſſes Mariannes en Prouence, iadis pleurent cailloux (ils y ſont encores) pour l’aide d’Hercules, n’ayant autrement dequoy combatre les deux enfans de Neptune. Mais quoy, deſcendons nous icy es limbes des petits enfans ? par dieu ils nous conchieront tous : ou bien en Enfer à tous les diables. Cor dieu ie les vous galleray bien à ceſte heure, que i’ay du pampre en mes ſouliers. O que ie me batray verdement. Où eſt-ce ? où ſont-ils ? ie ne crains que leurs cornes. Mais les deux cornes, que Panurge marié portera, m’en garentiront entierement. Ie le voy ia, en eſprit prophetique, vn autre Acteon cornant, cornu, cornancul. Garde, frater, diſt Panurge, attendant qu’on marira les Moines, que n’eſpouſe la fiebure quartaine. Car ie puiſſe donc ſauf & ſain retourner de ceſtuy Hypogee, en cas que ie ne te la beline, pour ſeulement te faire cornigere, cornipetant : autrement penſe-ie bien que la fiebure quarte eſt aſſez mauuaiſe bague. Il me ſouuient que Grippe-minaud te la voulut donner pour femme, mais tu l’appellas heretique.

Icy fut le propos interrompu par noſtre ſplendide lanterne nous remonſtrant, que là eſtoit le lieu, auquel conuenoit fauorer & par ſuppreſſion de parolles, & taciturnité de langues : du demourant, fiſt reſponſe peremptoire, que de retourner ſans auoir le mot de la bouteille, n’euſſions d’eſpoir aucun, puis qu’vne fois auions nos ſouliers feuſtrez de pampre.

Paſſons donques, diſt Panurge, & donnons de la teſte à trauers tous les diables. A perir n’y a qu’vn coup. Toutesfois ie me reſeruois la vie pour quelque bataille. Boutons, boutons, paſſons outre. I’ay du courage tant & plus : vray eſt, que le cœur me tremble, mais c’eſt pour la froideur & relenteur de ce Cauayn. Ce n’eſt de peur non, ne de fiebure. Boutons, boutons, paſſons, pouſſons, piſſons. Ie m’appelle Guillaume ſans peur.

Leur propos fut du trou de ſainct Patrice,
De Gilbathar, & de mille autres trous.

L’Eueſque print le theſme de l’Epiſtre
Pour mieux ouurir l’entendement à tous
Et feiſt ſerment que le fons de ſa mitre
Eſtoit ſi froid qu’il en auoit la toux.
On luy fourra, puis il parla plus doulx
Et deuiſa du trou de la ſybille,
De ſainct Patrice & de mille autres troux ;
Mais i’ay vn peu la memoire labile.