LeCinquiemeLivre · 44

a fiſt Bacbuc, la noble pontife, Panurge beſſer, & baiſer la marge de la fontaine : puis le fiſt leuer, & autour danſer trois Ithymbons. Cela fait, luy commanda s’aſſeoir entre deux ſcelles le cul à terre, là preparees. Puis deſploya ſon liure ritual, & luy ſoufflant en l’aureille gauſche, le fiſt chanter vne Epilenie, comme s’enſuit.

O Bouteille
Plaine toute
De miſteres,
D’vne aureille
Ie t’eſcoute :
Ne differes,
Et le mot proferes,
Auquel pend mon cœur.
En la tant diuine liqueur,
Qui eſt dedans tes flancs recloſe,
Baccus, qui fut d’Inde vainqueur,
Tient toute verité encloſe.
Vin tant diuin loin de toy eſt forcloſe
Toute menſonge, & toute tromperie.
En ioye ſoit l’ame de Noach cloſe,
Lequel de toy nous fiſt la temperie.
Sonne le beau mot, ie t’en prie,
Qui me doit oſter de miſere.
Ainſi ne ſe perde vne goutte
De toy, ſoit blanche ou ſoit vermeille.
O Bouteille
Plaine toute
De myſteres,
D’vne aureille
Ie t’eſcoute :
Ne differes.

Ceſte chanſon paracheuee, Bacbuc ietta ie ne ſçay quoy dedans la fontaine, & ſoudain commença l’eau bouillir à force, comme fait la grande marmite de Bourgueil, quant y eſt feſte à baſtons. Panurge eſcoutoit d’vne aureille en ſilence, Bacbuc ſe tenoit pres de luy agenouillee : quant de la ſacree Bouteille iſſit vn bruit, tel que font les abeilles naiſſantes de la chair d’vn ieune taureau occis & accouſtré ſelon l’art & inuention d’Ariſteus, ou tel que fait vn guarot deſbandant l’arbaleſte, ou en eſté vne forte pluye ſoudainement tombant. Lors fut ouy ce mot, Trinch. Elle eſt, s’eſcria Panurge, par la vertu dieu, rompue, ou feſlee que ie ne mente : ainſi parlent les bouteilles criſtalines de nos pays, quant elles pres du feu eſclattent.

Lors Bacbuc ſe leua, & print Panurge ſouz le bras doucettement, luy diſant : Amy, rendez graces és cieux, la raiſon vous y oblige : vous auez promptement eu le mot de la diue Bouteille : Ie dy le mot plus ioyeux, plus diuin, plus certain, qu’encores d’elle aye entendu, depuis le temps qu’icy ie miniſtre à ſon treſſacré Oracle. Leuez vous, allons au chapitre, en la gloſe duquel eſt le beau mot interprété. Allons, diſt Panurge, de par Dieu. Ie ſuis auſſi ſage, que entan. Eſclairez, où eſt ce liure, tournez, où eſt ce chapitre, voyons ceſte ioyeuſe gloſe.