LeCinquiemeLivre · 16bis

i toſt que les ancres furent iectees & le vaiſſeau aſſeuré lon deſcendit l’eſquif. Apres que le bon Pantagruel eut fait les prieres & remercié le Seigneur de l’auoir ſauué de ſi grand danger il entra & toute ſa compagnie dans l’eſquif, pour prendre terre, ce qui leur fut fort aiſé, car la mer eſtant calme & les vents baiſſez, en peu de temps ils furent aux rochiers. Comme ils eurent prins terre, Epiſtemon qui admiroit l’aſſiete du lieu & l’eſtrangeté des rochiers, aduiſa quelques habitans dudit pays. Le premier à qui il s’adreſſa, eſtoit veſtu d’vne robbe gocourte, de couleur de roy, auoit le pourpoint de demy oſtade à bas de manches de ſatin, & le haut eſtoit de chamois, le bonnet à la coquarde, homme d’aſſez bonne façon, & comme depuis nous ſçeumes, il auoit nom Gaingnebeaucoup. Epiſtemon luy demanda comme s’appelloyent ces rochiers & vallees ſi eſtranges. Gaingnebeaucoup luy diſt que le pays des rochiers qui eſtoit vne colonie tiree du pays de procuration, l’appelloyent les Cahiers : & qu’au delà des rochiers ayant paſſé vn petit guay, nous trouuerions l’iſle des Apedeſtes. Vertu des extrauagantes, diſt frere Iean, & vous autres gens de bien dequoy viuez vous icy ? Sçaurions nous boire en voſtre voirre car ie ne vous voy aucuns outils que parchemins, cornets, & plumes. Nous ne viuons, reſpondit Gaingnebeaucoup, que de cela auſſi : car il faut que tous ceux qui ont affaire en l’iſle paſſent par nos mains. Pourquoy diſt Panurge, eſtes vous barbiers qu’il faut qu’ils ſoyent teſtonnez ? Ouy, dit Gaingnebeaucoup, quant aux teſtons de leur bourſe. Par Dieu, diſt Panurge, vous n’aurez de moy denier ni maille : mais ie vous prie beau ſire menez nous à ces Apedeſtes car nous venons du pays des ſçauans, où ie n’ay gueres gaingné. En diuiſant ils arriuerent en l’iſle des Apedeſtes, car l’eau fuſt tantoſt paſſee. Pantagruel fut en grande admiration de la ſtructure de la demeure & habitation des gens du pays car ils demeurent en vn grand preſſouër auquel on monte pres de cinquante degrez : & auant que d’entrer au maiſtre preſſouër, car leans y a de petits, grands, ſecrets, moyens, & de toutes ſortes, vous paſſez par vn grand Periſtile, où vous voyez en païſage les ruines preſque de tout le monde : tant de potences, de grans larrons, tant de gibbets, de queſtions, que cela vous fait peur. Voyant Gaingnebeaucoup que Pantagruel s’amuſoit à cela : monſieur, dit-il : Allons plus auant, cecy n’eſt rien. Comment, dit frere Iean, ce n’eſt rien, par l’ame de ma braguette eſchauffee Panurge & moy tremblons de belle faim. I’aymerois mieux boire que veoir ces ruines ici. Venez, diſt Gaingnebcaucoup. Lors nous mena à vn petit preſſouër qui eſtoit caché ſur le derriere, que lon appelloit en langage de l’iſle, Pithies. Là ne demandez pas ſi maiſtre Iean ſe traiſta & Panurge : car ſaulciſons de Millan, cocqs d’Inde, chappons, autardes, maluoiſie, & toutes bonnes viandes eſtoyent preſtes & bien accouſtrees. Vn petit boutiller voyant que frere Iean auoit donné vne œillade amoareuſe ſur vne bouteille qui eſtoit pres d’vn buffet, ſeparee de la trouppe boutillique, diſt à Pantagruel, monſieur, ie voy que l’vn de vos gens fait l’amour à ceſte bouteille, ie vous ſupplie qu’il n’y ſoit touché, car c’eſt pour meſſieurs. Comment, diſt Panurge, il y a donc des Meſſiers ceans, lon y vendange à ce que ie voy. Alors Gaingnebeaucoup nous fiſt monter par vn petit degré caché en vne chambre, par laquelle il nous monſtra les Meſſieurs qui eſtoyent dans le grand preſſouër, auquel il nous diſt qu’il n’eſtoit licite à l’homme d’y entrer ſans leur congé : mais que nous les verrions bien par ce petit goulet de feneſtre ſans qu’ils nous viſſent.

Quand nous y fuſmes nous aduiſames dans vn grand preſſouër vingt ou vingtcinq gros pendars à l’entour d’vn grand bourreau tout habillé de verd, qui s’entreregardoyent, ayans les mains longues comme iambe de gruë, & les ongles de deux pieds pour le moins, car il leur eſt defendu de ne les rongner iamais, de ſorte qu’ils leur deuiennent croches comme rançons ou riuereaux : & ſur l’heure fut amenee vne groſſe grappe des vignes, qu’on vendange en ce pays là, du plant de l’extraordinaire, qui ſouuent pend à Eſchalats. Si toſt que la grappe fut là ils la meirent au preſſouër & n’y eut grain dont pas vn ne preſſuraſt de l’huyle d’or, tant que la poure grappe fut ramportee ſi ſeiche & eſpluchee qu’il n’y auoit plus iuſt ne liqueur du monde. Or nous comptoit Gaingnebeaucoup qu’ils n’ont pas ſouuent ces groſſes grappes là : mais qu’ils en ont touſiours d’autres ſur le preſſouër. Mais mon compere, diſt Panurge, en ont ils de beaucoup de plans ? Ouy, dit Gaingnebeaucoup, voyez vous bien celle la petite que voyez qui s’en va remettre au preſſouër, elle eſt du plan des decimes : ils en tirerent deſia l’autre iour iuſques au preſſurage, mais l’huyle ſentoit le coffre au preſtre, & meſſieurs n’y trouuerent pas grand appigrets. Pourquoy donc, diſt Pantagruel, la remettent ils au preſſouër ? Pour veoir, dit Gaingnebeaucoup, s’il y a point quelque omiſſion de ius ou recepte dans le marc. Et vertu Dieu, dit frere Iean, appellez vous ces gens là ignorans ? comme diable, ils tireroyent de l’huyle d’vn mur. Auſſi font-ils, diſt Gaingnebeaucoup : car ſouuent ils mettent au preſſouër des chaſteaux, des parcs, des foreſts, & de tout en tirent l’or potable : vous voulez dire portable, dit Epiſtemon. Ie dy potable, diſt Gaingnebeaucoup, car lon en boit ceans mainte bouteille que lon ne beuroit pas. Il y en a de tant de plants que lon n’en ſçait le nombre. Paſſez iuſques icy & voyez dans ce courtil, en voyla plus de mille qui n’attendent que l’heure de eſtre preſſurez, en voyla du plan general, voyla du particulier, des fortifications, des emprunts, des dons, des caſuels, des dommaines, des menuz plaiſirs, des poſtes, des offrandes, de la maiſon. Et qui eſt ceſte groſſe là à qui toutes ces petites ſont à l’enuiron ? C’eſt, dit Gaingnebeaucoup, de l’eſpargne, qui eſt le meilleur plan de tout ce pays : quand on en preſſure de ce plan, ſix moys apres il n’y a pas vn de meſſieurs qui ne s’en ſente. Quand ces meſſieurs furent leuez Pantagruel pria Gaingnebeaucoup, qu’il nous menaſt en ce grand preſſouër : ce qu’il fiſt volontiers. Si toſt que fuſmes entrez Epiſtemon qui entendoit toutes langues, commença à monſtrer à Pantagruel les deuiſes du preſſouër, qui eſtoit grand & beau, fait à ce que nous dit Gaingnebeaucoup du boys de la croix : car ſur chacun vtencile eſtoyent eſcripts les noms de chacune choſe en langue du pays. La viz du preſſouër s’appelloit recepte : la mets, deſpenſe : lecrouë, eſtat : le teſſon, deniers comptez & non receuz : les fuſts, ſouffrance : les belliers, radietur : les iumelles, recuperetur : les cuues, plus valleur : les anſees, rooles : les foullouaires, acquits : les hottes, validation : les portoires, ordonnance vallable : les ſeilles, le pouuoir : l’entonnoir, le quittus. Par la royne des Andouilles, diſt Panurge, toutes les hieroglyphiques d’Egypte n’approcherent iamais de ce iargon, que diable ces mots là rencontrent de picques comme crottes de cheure. Mais pourquoy, mon compere, mon amy, appelle-on ces gens icy ignorans ? Par ce, diſt : Gaingnebeaucoup, qu’ils ne ſont & ne doyuent nullement eſtre clercs, & que ceans par leur ordonnance tout ſe doibt manier par ignorance, & n’y doibt auoir raiſon, ſinon que meſſieurs l’ont dit, meſſieurs le veulent, meſſieurs l’ont ordonné. Par le vray Dieu, diſt Pantagruel, puis qu’ils gaingnent tant aux grappes le ſerment leur peut beaucoup valloir. En doubtez vous ? diſt Gaingnebeaucoup. Il n’eſt mois qu’ils n’en ayent, ce n’eſt pas comme en vos pays où le ſerment ne vous vault rien qu’vne fois l’annee. De là pour nous mener par mille petis preſſouërs, en forçant nous aduiſaſmes vn autre petit bourreau, à l’entour duquel eſtoyent quatre ou cinq de ces ignorans, craſſeux, choleres comme aſnes à qui lon a attaché vne fuſee aux feſſes, qui ſur vn petit preſſouër, qu’ils auoyent là repaſſoyent encores le marc des grappes apres les autres, lon les appelloit en langage du pays Courracteurs. Ce ſont les plus rebarbatifs villains à les veoir, diſt frere Iean, que i’aye point apperceu. De ce grand preſſouër nous paſſaſmes par infinis petits preſſouërs tous pleins de vendangeurs, qui eſpluchent les grains auec des ferremens qu’ils appellent articles de compte : & finablement arriuaſmes en vne baſſe ſalle où nous veiſmes vn grand dogue à deux teſtes de chien : ventre de loup, griffé comme vn diable de Lamballe, qui eſtoit là nourri de laict d’amendes, & eſtoit ainſi delicatement par l’ordonnance de meſſieurs, parce qu’il n’y auoit celuy à qui il ne valuſt bien la rente d’vne bonne meſtairie, ils l’appelloyent en langue d’ignorance, Dupple. Sa mere eſtoit aupres, qui eſtoit de pareil poil & forme, hors mis qu’elle auoit quatre teſtes, deux maſles & deux femelles, & elle auoit nom Quadruple, laquelle eſtoit la plus furieuſe beſte de leans & la plus dangereuſe apres ſa grand mere, que nous veiſmes enfermee en vn cachot, qu’ils appelloyent omiſſion de recepte. Frere Iean qui auoit touſiours vingt aulnes de boyaux vuides, pour aualler vne ſaugrenee d’aduocats ſe commençant à faſcher pria Pantagruel de penſer du diſner & de mener auecques luy Gaingnebeaucoup, de ſorte qu’en ſortant de leans par la porte de derriere nous rencontraſmes vn vieil homme encheſné, demi ignorant, demi ſauant, comme vn Androgyne de diable, qui eſtoit de lunettes caparaſſonné, comme vne tortue d’eſcailles & ne viuoit que d’vne viande qu’ils appellent en leur pattois appellations. Le voyant Pantagruel demanda à Gaingnebeaucoup, de quelle race eſtoit ce protenotaire & comme il s’apelloit. Gaingnebeaucoup nous compta comme de toute ancienneté il eſtoit leans au grand regret de meſſieurs encheſné, qui le faiſoyent preſque mourir de faim, & qu’il ſe appelloit Reuiſit. Par les ſaincts couillons du Pape, dit frere Iean, voyla vn beau danſeur : & ie ne m’eſbahis pas ſi meſſieurs les ignorans d’icy font grand cas de ce papelard là. Par Dieu il m’eſt aduis, amy Panurge, ſi tu y regardes bien qu’il a le minois de Grippeminault : ceux-cy tous ignorans qu’ils ſont en ſauent autant que les autres, ie le renuoyerois bien d’où il eſt venu à grans coups d’anguillade. Par mes lunettes orientales, diſt Panurge, frere Iean mon amy, tu as raiſon : car à veoir la trongne de ce faux villain Reuiſit il eſt encores plus ignorant & meſchant que ces poures ignorans icy, qui grappent au moins mal qu’ils peuuent, ſans long procez, & qui en trois petits mots vendangent le clos ſans tant d’interlocutoires, ni decrotoires, dont ces chats fourrez en ſont bien faſchez.

L’alloient quelquefois teſtonnant,
C’eſt-à-dire ajuſtant ſa teſte.

(L’Homme entre deux âges, & ſes deux maiſtreſſes)

et le mot teſton, désignant une pièce de monnaie.