Gargantua · 53

ovr le baſtiment & aſſortiment de l’abbaye Gargantua feiſt liurer de content vingt & ſept cent mille huyt cent trente & vn moutons à la grand laine, & par chaſcun an, iuſques à ce que le tout feuſt parfaict, aſſigna, ſus là recepte de la Diue ſeze cent ſoixante & neuf mille eſcuz au ſoleil, & autant à l’eſtoille pouſſiniere. Pour la fondation & entretenement d’icelle donna à perpetuité vingt troys cent ſoixante neuf mille cinq cens quatorze nobles à la roſe de rente fonciere, indemnez, amortyz, & ſoluables par chaſcun an à la porte de l’abbaye. Et de ce leurs paſſa belles lettres. Le baſtiment feut en figures exagone, en telle façon que à chaſcun angle eſtoit baſtie vne groſſe tour ronde à la capacité de ſoixante pas en diametre. Et eſtoient toutes pareilles en groſſeur & protraict. La riuiere de Loyre decoulloit ſus l’aſpect de Septentrion. Au pied d’icelle eſtoit vne des tours aſſiſe, nommee Artice. Et tirant vers l’orient eſtoit vne aultre nommee Calaer. L’aultre enſuiuant Anatole. L’aultre apre Meſembrine. L’aultre apres Heſperie. La derniere Cryere.

Entre chaſcune tour eſtoit eſpace de troys cent douze pas. Le tout baſty à ſix eſtages, comprenent les caues ſoubz terre pour vn. Le ſecond eſtoit voulté à la forme d’vne anſe de panier. Le reſte eſtoit embrunché de guy de Flandres à forme de culz de lampes, le deſſus couuert d’Ardoize fine : auec l’endouſſeure de plomb à figures de petitz manequins & animaulx bien aſſortiz & dorez, auec les goutieres que yſſoient hors la muraille entre les croyzees, pinctes en figure diagonale de or & azur, iuſques en terre, ou finiſſoient en grands eſchenaulx qui tous conduiſoient en la riuiere par deſſoubz le logis. Ledict baſtiment eſtoit cent foys plus magnificque que n’eſt Boniuet, ne Chambourg, ne Chantilly. Car en ycelluy eſtoient neuf mille troys cens trente & deux chambres : chaſcune guarnie de arriere chambre, cabinet, guarde robbe, chapelle, & yſſue en vne grande ſalle. Entre chaſcune tour, au mylieu dudict corps de logis, eſtoit vne viz brizee dedans icelluy meſmes corps. De laquelle les marches eſtoient part de porphyre, part de pierre Numidicque, part de marbre ſerpentin : longues de xxij. piedz : l’eſpeſſeur eſtoit de troys doigtz, l’aſſiete par nombre de douze entre chaſcun repous. En chaſcun repous eſtoient deux beaulx arceaux d’antique par leſquelz eſtoit repceu la clarté : & par iceulx on entroit en vn cabinet faict à clere voys de largeur de ladicte viz : & montoit iuſques au deſſus la couuerture, & là finoit en pauillon. Par icelle viz on entroit de chaſcun couſté en vne grande ſalle, & des ſalles es chambres. Depuis la tour Artice iuſques à Cryere eſtoient les belles grandes librairies, en Grec, Latin, Hebrieu, Françoys, Tuſcan & Heſpaignol : diſparties par les diuers eſtaiges ſelon iceulx langaiges. Au mylieu eſtoit vne merueilleuſe viz, de laquelle l’entree eſtoit par le dehors du logis en vn arceau large de ſix toizes. Icelle eſtoit faicte en telle ſymmetrie & capacité que ſix hommes d’armes, la lance ſus la cuiſſe, pouoient de front enſemble monter iuſques au deſſus de tout le baſtiment. Depuis la tour Anatole iuſques à Meſembrine eſtoient belles grandes galleries, toutes pinctes des antiques proueſſes, hiſtoires & deſcriptions de la terre. Au milieu eſtoit vne pareille montee & porte comme auons dict du couſté de la riuiere. Sus icelle porte eſtoit eſcript, en groſſes lettres antiques, ce que s’enſuit.