Pantagruel · 21

anvrge commença à eſtre en reputation en la ville de Paris par ceſte diſputation qu’il obtint contre l’Angloys, & faiſoit des lors bien valoir ſa braguette, & la feiſt au deſſus eſmoucheter de broderie à la Romanicque. Et le monde le louoit publicquement, & en feut faict vne Chanſon, dont les petitz enfans alloyent à la mouſtarde, & eſtoit bien venu en toutes compaignies de dames & damoiſelles, en ſorte qu’il deuint glorieux, ſi bien qu’il entreprint de venir au deſſus d’vne des grandes dames de la ville. De faict, laiſſant vn tas de longs prologues & proteſtations que font ordinairement ces dolens contemplatifz amoureux de Kareſme, leſquelz poinct à la chair ne touchent, luy dit vn iour. Ma dame, ce ſeroit vn bien fort vtile à toute la republicque, delectable à vous, honneſte à voſtre lignee, & à moy neceſſaire, que feuſſiez couuerte de ma race, & le croyez, car l’experience vous le demonſtrera. La dame à ceſte parolle le reculla plus de cent lieues, diſant. Meſchant fol, vous appertient il me tenir telz propos ? A qui penſez vous parler ? Allez, ne vous trouuez iamais deuant moy, car ſi n’eſtoit pour vn petit, ie vous feroys coupper bras & iambes. Or (diſt il) ce me ſeroit tout vn d’auoir bras & iambes couppez, en condition que nous fiſſions vous & moy vn tranſon de chere lie, iouant des manequins à baſſes marches : car (monſtrant ſa longue braguette) voicy maiſtre Iean Ieudy : qui vous ſonneroit vne antiquaille, dont vous ſentiriez iuſques à la mouelle des os. Il eſt galland & vous ſçait bien trouuer les alibitz forains & petitz poullains grenez en la ratouere, que apres luy il n’y a que eſpouſſeter. A quoy reſpondit la dame. Allez, meſchant, allez, ſi vous m’en dictes encores vn mot, ie appelleray le monde : & vous feray icy aſſommer de coups. Ho (diſt il) vous n’eſtes tant male que vous dictes, non, ou ie ſuis bien trompé à voſtre phyſionomie : car plus toſt la terre monteroit es cieulx & les haulx cieulx deſcendroyent en l’abiſme & tout ordre de nature ſeroit paruerty, qu’en ſi grande beaulté & elegance comme la voſtre, y euſt vne goutte de fiel, ny de malice. L’on dict bien que à grand peine veit on iamais femme belle, qui auſſi ne feuſt rebelle : mais cella eſt dict de ces beaultez vulgaires. La voſtre eſt tant excellente, tant ſinguliere, tant celeſte, que ie croy que nature l’a miſe en vous comme vn parragon pour nous donner entendre combien elle peut faire quand elle veult employer toute ſa puiſſance & tout ſon ſçauoir. Ce n’eſt que miel, ce n’eſt que ſucre, ce n’eſt que manne celeſte, de tout ce qu’eſt en vous. C’eſtoit à vous à qui Paris debuoit adiuger la pomme d’or, non à Venus non, ny à Iuno, ny à Minerue : car oncques n’y eut tant de magnificence en Iuno, tant de prudence en Minerue, tant de elegance en Venus, comme y a en vous. O dieux & deeſſes celeſtes, que heureux ſera celluy à qui ferez celle grace de ceſte cy accoller, de la baiſer & de frotter ſon lart auecques elle. Par dieu, ce ſera moy, ie le voy bien, car deſia elle me ayme tout à plein, ie le congnoys, & fuis à ce predeſtiné des phees. Doncques pour gaigner temps boutte pouſſeniambions. Et la vouloit embraſſer, mais elle fiſt ſemblant de ſe mettre à la feneſtre pour appeller les voiſins à la force. Adoncques ſortit Panurge bien toſt, & luy diſt en fuyant. Ma dame, attendez moy icy, ie les voys querir moy meſme, n’en prenez la poine. Ainſi s’en alla, ſans grandement ſe ſoucier du reffus qu’il auoit eu, & n’en fiſt oncques pire chiere.

Au lendemain il ſe trouua à l’egliſe à l’heure qu’elle alloit à la meſſe, à l’entree luy bailla de l’eau beniſte ſe enclinant parfondement deuant elle, apres ſe agenouilla aupres de elle familiairement, & luy diſt. Ma dame, ſaichez que ie ſuis tant amoureux de vous, que ie n’en peuz ny piſſer ny fianter, ie ne ſçay comment l’entendez. S’il m’en aduenoit quelque mal, que en ſeroit il ? Allez (diſt elle) allez, ie ne m’en ſoucie : moy icy prier dieu.

Mais (diſt il) equiuocquez ſur A beaumont le viconte. Ie ne ſçauroys, dit elle. C’eſt (diſt il) A beau con le vit monte. Et ſur cella priez dieu qu’il me doint ce que voſtre noble cueur deſire, & me donnez ces patenoſtres par grace. Tenez (diſt elle) & ne me tabuſtez plus. Ce dict, luy vouloit tirer ſes patenoſtres que eſtoyent de celtrin auecques groſſes marques d’or, mais Panurge promptement tira vn de ſes couſteaux, & les couppa treſbien, & les emporta à la fryperie, luy diſant, voulez vous mon couſteau ? Non, non, diſt elle. Mais (diſt il) à propos, il eſt bien à voſtre commandement corps & biens, tripes & boyaulx.

Ce pendent la dame n’eſtoit fort contente de ſes patenoſtres : car c’eſtoit vne de ſes contenences à l’egliſe. Et penſoit, ce bauart icy eſt quelque eſuenté, homme d’eſtrange pays, ie ne recouureray iamais mes patenoſtres, que m’en dira mon mary ? Il s’en courroucera à moy : mais ie luy diray qu’vn larron me les a couppees dedans l’egliſe, ce qu’il croira facillement, voyant encores le bout du ruban à ma ceincture. Apres diſner Panurge l’alla veoir, portant en ſa manche vne grande bourſe pleine d’eſcuz du palais & de gettons, & luy commença à dire.

Lequel des deux ayme plus l’aultre, ou vous moy, ou moy vous ? A quoy elle reſpondit. Quant eſt de moy ie ne vous hays poinct : car comme dieu le commande, ie ayme tout le monde.

Mais à propos (diſt il) n’eſtes vous pas amoureuſe de moy ? Ie vous ay (diſt elle) ia dit tant de foys que vous ne me teniſſiez plus telles parolles, ſi vous m’en parlez encores ie vous monſtreray que ce n’eſt pas à moy à qui vous debuez ainſi parler de deſhonneur. Partez d’icy, & me rendez mes patenoſtres, à ce que mon mary ne me les demande. Comment (diſt il) ma dame, voz patenoſtres ? Non feray, par mon ſergent, mais ie vous en veux bien donner d’aultres : en aymerez vous mieulx d’or bien eſmaillé en forme de groſſes ſpheres, ou de beaux lacz d’amours, ou bien toutes maſſifues comme gros lingotz, ou ſi en voulez de Ebene, ou de gros Hyacinthes, de gros grenatz taillez auecques les marches de fines Turquoyſes, ou de beaulx Topazes marchez de fins Saphiz, ou de beaulx Balays à tout groſſes marches de Dyamans à vingt & huyt quarres ? Non, non, c’eſt trop peu. I’en ſçay vn beau chappelet de fines Eſmeraudes marchees de Ambre gris, coſcoté, & à la boucle vn Vnion Perſicque gros comme vne pomme d’orange : elles ne couſtent que vingt & cinq mille ducatz, ie vous en veulx faire vn preſent : car i’en ay du content. Et de ce diſoit faiſant ſonner ſes gettons comme ſi ce feuſſent eſcuz au ſoleil. Voulés vous vne piece de veloux violet cramoyſi tainct en grene, vne piece de ſatin broché ou bien cramoyſi ? Voulez vous chainez, doreures, templettes, bagues ? Il ne fault que dire ouy. Iuſques à cinquante mille ducatz, ce ne m’eſt rien cela. Par la vertus deſquelles parolles il luy faiſoit venir l’eau à la bouche. Mais elle luy dict. Non, ie vous remercie : ie ne veulx rien de vous. Par dieu (diſt il) ſi veulx bien moy de vous : mais c’eſt choſe qui ne vous couſtera rien, & n’en aurez de rien moins. Tenez (monſtrant ſa longue braguette) voicy maiſtre Ian Chouart qui demande logis, & apres la vouloit accoller : mais elle commença à s’eſcrier, toutesfoys non pas trop hault. Adoncques Panurge tourna ſon faulx viſaige, & luy dict. Vous ne voulez doncques aultrement me laiſſer vn peu faire ? Bren pour vous. Il ne vous appartient tant de bien ny de honneur : mais, par Dieu, ie vous feray cheuaucher aux chiens : & ce dict, s’en fouit le grand pas de peur des coups : leſquelz il craignoit naturellement.