Pantagruel · 22

r notez que le lendemain eſtoit la grand feſte du ſacre, à laquelle toutes les femmes ſe mettent en leur triumphe de habillemens : & pour ce iour ladicte dame s’eſtoit veſtue d’vne treſbelle robbe de ſatin cramoyſi, & d’vne cotte de veloux blanc bien precieux. Le iour de la vigile Panurge chercha tant d’vn couſté & d’aultre qu’il trouua vne lyciſque orgooſe laquelle il lya auecques ſa ceincture & la mena en ſa chambre, & la nourrit treſbien cedict iour & toute la nuyct, au matin la tua, & en prit ce que ſçauent les Geomantiens Gregeoys, & le miſt en pieces le plus menu qu’il peut, & les emporta bien cachees, & alla ou la dame deuoit aller pour ſuyure la proceſſion, comme eſt de couſtume à ladicte feſte. Et alors qu’elle entra, Panurge luy donna de l’eau beniſte bien courtoiſement la ſaluant, & quelque peu de temps apres qu’elle eut dit ſes menuz ſuffrages il ſe va ioindre à elle en ſon banc, & luy bailla vn Rondeau par eſcript en la forme que s’enſuyt.

⸿ Rondeau.

Pour ceſte foys, que à vous dame treſbelle
Mon cas diſoys, par trop feuſtes rebelle
De me chaſſer, ſans eſpoir de retour :
Veu qu’à vous oncq ne feis auſtere tour
En dict ny faict, en ſoubſon ny libelle.
Si tant à vous deplaiſoit ma querelle,
Vous pouuiez par vous, ſans maquerelle,
Me dire, amy, partez d’icy entour,
Pour ceſte foys.
Tort ne vous fays, ſi mon cueur vous decelle,
En remonſtrant comme l’ard l’etincelle
De la beaulté que couure voſtre atour :
Car riens ny quiers, ſinon qu’en voſtre tour
Me faciez dehait la combrecelle,
Pour ceſte foys.

Et ainſi qu’elle ouurit le papier pour veoir que c’eſtoit, Panurge promptement ſema la drogue qu’il auoit ſur elle en diuers lieux, & meſmement au replis de ſes manches & de ſa robbe, & puis luy diſt. Ma dame, les pauures amans ne ſont touſiours à leur aiſe. Quant eſt de moy i’eſpere que les males nuicts, les trauaulx & ennuytz, eſquelz me tient l’amour de vous, me ſeront en deduction d’autant des poines de purgatoire. A tout le moins priez dieu qu’il me doint mon mal en patience. Panurge n’eut acheué ce mot, que tous les chiens qui eſtoient en l’egliſe acoururent à ceſte dame pour l’odeur des drogues qu’il auoit eſpandu ſur elle : petitz & grands, gros & menuz, tous y venoyent tirant le membre & la ſentens & piſſans par tout ſur elle : c’eſtoit la plus grande villanie du monde. Panurge les chaſſa quelque peu, puis d’elle print congé & ſe retira en quelque chapelle pour veoir le deduyt : car ces villains chiens compiſſoyent tout ſes habillemens, tant que vn grand leurier qui luy piſſa ſur la teſte, les aultres aux manches, les aultres à la croppe : & les petitz piſſoient ſes patins. En ſorte que toutes les femmes de là autour auoyent beaucoup affaire à la ſauluer. Et Panurge de rire, & diſt à quelcun des ſeigneurs de la ville. Ie croy que ceſte dame là eſt en chaleur, ou bien que quelque leurier l’a couuerte fraiſchement. Et quand il veid que tous les chiens grondoyent bien à l’entour de elle comme ilz font autour d’vne chienne chaulde, partit de là, & alla querir Pantagruel. Par toutes les rues ou il trouuoit des chiens il leur bailloit vn coup de pied, diſant. Ne yrez vous pas auec voz compaignons aux nopces ? Deuant, deuant, de par le diable, deuant.

Et arriué au logis diſt à Pantagruel, Maiſtre, ie vous prye venez veoir tous les chiens du pays qui ſont aſſemblés à l’entour d’vne dame la plus belle de ceſte ville, & la veullent iocqueter. A quoy voluntiers conſentit Pantagruel, & veit le myſtere lequel il trouua fort beau & nouueau. Mais le bon feut à la proceſſion : en laquelle feurent veuz plus de ſix cens mille & quatorze chiens à l’entour d’elle, leſquelz luy faiſoyent mille hayres : & par tout ou elle paſſoit les chiens frays venuz la ſuyuoyent à la trace, piſſans par le chemin ou ſes robbes auoyent touché.

Tout le monde ſe areſtoit à ce ſpectacle, conſiderant les contenances de ces chiens qui luy montoyent iuſques au col, & luy gaſterent tout ces beaulx acouſtremens, à quoy ne ſceut trouuer aulcun remede, ſinon ſoy retirer en ſon hoſtel.

Et chiens d’aller apres, & elle de ſe cacher, & chamberieres de rire. Quand elle feut entree en ſa maiſon & fermé la porte apres elle, tous les chiens y accouroyent de demye lieue, & compiſſerent ſi bien la porte de ſa maiſon qu’ilz y feirent vn ruyſſeau de leurs vrines, auquel les cannes euſſent bien nagé. Et c’eſt celluy ruyſſeau qui de preſent paſſe à ſainct Victor, auquel Guobelin tainct l’eſcarlatte, pour la vertu ſpecificque de ces piſſe chiens, comme iadis preſcha publicquement noſtre maiſtre Doribus. Ainſi vous aiſt dieu, vn moulin y euſt peu mouldre. Non tant toutesfoys que ceulx du Bazacle à Thouloufe.