Pantagruel · 23

ev de temps apres Pantagruel ouyt nouuelles que ſon pere Gargantua auoit eſté tranſlaté au pays des Phees par Morgue, comme fut iadis Ogier & Artus, enſemble que le bruyt de ſa tranſlation entendu, les Dipſodes eſtoient yſſuz de leurs limites, & auoient gaſté vn grand pays de Vtopie, & tenoyent pour lors la grande ville des Amaurotes aſſiegee. Dont partit de Paris ſans dire adieu à nulluy : car l’affaire requeroit diligence, & vint à Rouen. Or en cheminant, voyant Pantagruel que les lieues de France eſtoient petites par trop au regard des aultres pays, en demanda la cauſe & raiſon à Panurge, lequel luy dit vne hiſtoires que mect Marotus du lac, monachus, es geſtes des Roys de Canarre.

Diſant que d’ancienneté les pays n’eſtoyent diſtinctz par lieues, miliaires, ſtades, ny paraſanges, iuſques à ce que le roy Pharamond les diſtingua, ce que feut faict en la maniere que s’enſuyt. Car il print dedans Paris cent beaulx ieunes & gallans compaignons bien deliberez, & cent belles garſes Picardes, & les feiſt bien traicter & bien penſer par huyt iours, puis les appella & à vn chaſcun bailla ſa garſe auecques force argent pour les deſpens, leur faiſant commandement qu’ilz allaſſent en diuers lieux par cy & par là. Et à tous les paſſaiges qu’ilz biſcoteroyent leurs garſes que ilz miſſent vne pierre, & ce ſeroit vne lieue. Ainſi les compaignons ioyeuſement partirent, & pource qu’ilz eſtoient frays & de ſeiour ilz fanfreluchoient à chaſque bout de champ, & voylà pourquoy les lieues de France ſont tant petites. Mais quand ilz eurent long chemin parfaict & eſtoient ia las comme pauures diables & qu’il n’y auoit plus d’olif en ly caleil, ilz ne belinoyent ſi ſouuent & ſe contentoyent bien (i’entends quant aux hommes) de quelque meſchante & paillarde foys le iour. Et voylà qui faict les lieues de Bretaigne, de Lanes, d’Allemaignes, & aultres pays plus eſloignez, ſi grandes. Les aultres mettent d’aultres raiſons : mais celle là me ſemble la meilleure. A quoy conſentit voluntiers Pantagruel. Partans de Rouen arriuerent à Hommefleur ou ſe mirent ſur mer Pantagruel, Panurge, Epiſtemon, Euſthenes, & Carpalim. Auquel lieu attendans le vent propice & calfretant leur nef receut d’vne dame de Paris (laquelle il auoit entretenue bonne eſpace de temps) vnes lettres inſcrites au deſſus.

Au plus aymé des belles, & moins loyal des preux,

P N T G R L.