III
POÉSIE LATINE DU MOYEN AGE
UNE PROSE D’ADAM DE SAINT-VICTOR[40] (XIIᵉ SIÈCLE)
[Page 203.]
1.
Laus crumpat ex affectu! Psallat chorus in conspectu Supernorum civium! Laus jocunda, laus decora, Quando laudi concanora Puritas est cordium.
2.
Michaelem cuncti laudent, Nec ab hujus se defraudent Diei lætitiâ. Felix dies, quâ sanctorum Recensetur Angelorum Solemnis victoria.
3.
Draco vetus exturbatur, Et Draconis effugatur Inimica legio. Exturbatus est turbator, Et projectus accusator, A cœli fastigio.
4.
Sub tutelâ Michaelis Pax in terrâ, pax in cœlis, Laus et jubilatio. Cum sit potens hic virtute, Pro communi stans salute, Triumphat in prœlio.
5.
Suggestor sceleris Pulsus à superis, Per hujus aeris Oberrat spatia. Dolis invigilat, Virus insibilat. Sed hunc annihilat Præsens custodia.
6.
Tres distinctæ hierarchiæ Jugi vacant theoriæ, Jugique psalterio. Nec obsistit theoria, Sive jugis harmonia, Jugi ministerio.
7.
O quàm miræ charitatis Est supernæ civitatis Ter terna distinctio, Quæ nos amat et tuetur Ut ex nobis restauretur Ejus diminutio!
8.
Sicut sunt hominum Diversæ gratiæ, Sic erunt ordinum Distinctæ gloriæ Justis in præmio. Solis est alia Quam lunæ dignitas, Stellarum varia Relucet claritas; Sic resurrectio.
9.
Vetus homo novitati, Se terrenus puritati Conformet cœlestium. Coæqualis his futurus, Licet nondum plenè purus, Spe præsumat præmium.
10.
Ut ab ipsis adjuvemur, Hos devotè veneremur, Instantes obsequio. Deo nos conciliat Angelisque sociat Sincera devotio.
11.
De secretis reticentes Interim cœlestibus, Erigamus puras mentes In cœlum cum manibus,
12.
Ut superna nos dignetur Cohæredes curia, Et divina collaudetur Ab utrisque gratia!
13.
Capiti sit gloria Membrisque concordia!
Amen.
