II
POPULUS.
A la place suymes venuz Que desirée avons souvent. A saluer suymes tenuz L’abbé de cy et le couvent, Et puis après, notre message Raconteron sans nul deffault.
CONSULTUS POPULI.
Sire, vous parlez comme sage, Et ainsi entendre le fault. Après vostre eloquence dicte, Verron bien, si c’est leur plaisir, Que la chose soit reconduyte Avecquez eulx, et s’en saisir Juscquez ad ce point n’est possible Que nous en puysson rien savoir. Cest jouel à qui est sensible Profite plus qu’or ne avoir. Alon d’accort leur presenter, Et par ytant en seron quictez.
POPULUS.
C’est bien dit: sans nous sermenter De nous en croire aront meritez. Celui qui est sans finement, Dicit abbati.
Messeigneurs, vous doint bonne estraine. Si ouyr vous plaist benignement, Le cas vous diron qui nous mene.
MAINART, ABBAS MONTIS.
Volentiers vous escouteron, Quer vous nous semblez gens honnestes, Par quoi point ne vous doubteron; Quer gens de bien pert que vous estes. A voir à vostre filomie, Ignorer n’en fault nullement.
POPULUS.
De rien ne vous mentiron mie: Pour nous seroit fait follement. Et vroy qu’au party dont nous sommes. Avoit ung serpent molt cruel, Nagairez, qui femes et hommes Devouroit à perpetuel. Du peuple la communité S’efforça pour le pourchacier. Veant sa grant malignité, A le tuer ou le chacier. La où son retraict il faisoit Sourvint de commun grant faison: Quer toutes fois qu’il lui plaisoit Envenymoit tout de poison. En un maroys trouvé couché Fut dudit peuple habitué Où il avoit été touché Et frapé à mort et tué.
MAINART ABBAS.
Qui fit cela?
POPULUS.
Nul ne savoit. Gens y furent de mainte guise. Ydonc si sage n’y aveit De nostre evesque et gens d’église Qui sachent qui avoit frapée Geste beste cruelle et felle. Mais son escu et son espée Lessa sanglans au plus près d’elle. L’evesque n’y sceut qu’aviser, Quant au regart de celle ensaigne, Fors porter pour en delivrer Au Mont de Gargaine en Champaigne. Nous deulx icy les portion En esperant de Dieu la grace; Mes tant plus fort nous allion, Plus eslognion de la place. Ung jouvencel après trouvasmes En chemin qui fut ensement: Que portion nous lui contasmes Qui nous introduyt grandement, Et de faict nous fist retourner, Disant estre l’ange Michel Qui venu est sans séjourner, Pour le serpent, lassus du ciel...
· · ·
· · ·
