XXVIII APPENDICE

Tant amere est que mort l’est bien peu davantagie; Mais pour traicter du bien qu’en ce lieu je trouvai, D'aultres choses diray dont je m'y suis fait saige.

Je ne sçai bien redire en quel sorte y entrai,

Tant rempli de sommeil j’estoye sur ce point Quant de la verité la voye habandonnai.

Mais depuis que je fu au pied du hault mont joint Où le val terminoit de quoi je vous devise,

Qui de paour en tel sorte avoit mon cueur compoingt,

Regardant contremont ses espaules j'avise Jà vestues des raiz du reluisant planette Qui par tous droictz chemins gens maine en bonne guise.

La paour qui dans le lac de mon cueur fut retraicte La nuyct qu'en tel pitié passay par l’aspre sort, S’apaisa lors ung peu et devint plus quiete.

Et comme ung qui, sortant du nauffraige à bon port, Hors d’alaine et moult las se tourne vers la rive Pour veoir l’eau perilleuse undoyer hors de bort,

Ainsi le myen couraige, ayant paour qu'on le suyve, Fuyant tournoit arriere à regarder le pas Qui ne laissa jamais personne au monde vive.

Puis, quand j’eu reposé ung bien peu le corps las, La voye je reprins par la plaine deserte,

Si que plus ferme estoit des deux piedz le plus bas.

Et commançant monter au hault à jambe ouverte, Une leonce vint legiere comme vent,

Qui de poil maculé estoit toute couverte.

Et vis à vis de moy se tenoit au devant, Dont si fort m’empeschoit à passer mon chemin, Que fu pour retourner rettiré bien souvant.

Sur ce temps commençoit la clarté du matin, Que le soleil montoit lassus o les esteiles Qui avec luy estoient lorsque l'amour divin

Fit tout premierement mouvoir ces choses belles, Si qu'esperoys la peau gaye avoir par raison De la beste sauvaige en l’enclore en mes toilles Veu l'heure du bon temps et la douce saison, Mais non tant que de peur n’eusse alors grosse estraincte D'un lion que cuydois veoir en dure achoison.

Cestui sembloit venir encontre moy sans feincte, Levant la teste en hault avec fain enraigée,