EXTRAICT DES REGISTRES DE PARLEMENT DU VIII JUILLET

M° Denis Poillet, sieur de Bailly, president en la cour, feist plaincte de certaines parolles injurieuses et scandaleuses a luy dictes contre l’honneur de ladicte court et le sien, par M. Charles de Rohan, chevalier, sieur de Gyé, dont les gens du Roy requirent qu’il fust informé, et ordonne la court qu’ilz auroient commission adressant a deux conseillers pour en informer.

Le douziesme juillet, Michelet, huissier de la chambre du Roy, vint de la court et dist que le Roy luy avoit commandé dire qu’il retenoit a luy la matière dudit sieur de Gyé et voulloit et prioit ladite court susceoir ladite matière, sans y toucher, jusques au retour du voyage que ledit sieur est délibéré faire de présent en Picardie , et qu’il en fera la raison ainsy qu’il trouvera par conseil, et que les prières du Roy sont commandemens.

Et, apres que ledit Michelet a esté interrogé s’il avoit aucunes lettres ou missives du Roy, et qu’il a respondu que non , luy a esté dit que la court avoit bien entendu ce qu’il avoit dict de par ledit seigneur.